LlGC Llsgr. 3035 (Mostyn 116) page 134v

Ac ar yr kalet yn|y vrỽẏdẏr Ac y|dangossynt eu clot drỽy

eu deỽred ac eu kampeu molyanus. ~ ~ ~ ~

A gỽedy treulaỽ ruthur o amser. Marỽ vu eu tadeu yn|y+

nys. prydein. Ac ỽynteu a ymchoelassant y|eu gỽlat. A|phob

vn o·nadunt a gymerth tref y dat a|e gyfoeth A|r getym+

deithas a oed yrydunt kyn no hyny Ac yrỽg eu tadeu kyn|noc

ỽynteu. hono a|gynhalassant ỽynteu ar talym. Ac eissoes ym

pen y dỽy vlyned. Etwin a|erchis y gatwaỻaỽn ganhat

y|wisgaỽ coron ohonaỽ y|parth draỽ y|humyr ac y gynal

gỽyalen megys y|gỽnaei gatwaỻaỽn y|parth yma y

humyr A gỽedy gỽneuthur oet dadleu onadunt ar

lan dulas y draethu o|hynẏ. A doethon o|pop parth yn e+

drych py beth oreu a dylynt yg|kylch hẏnẏ. A|chatwaỻaỽn

yn gorwed o|r parth yma y|r afon A|e pen yn arfet breint

hir y|nei. hyt tra yttoedynt y|kenadeu yn arwein atte+

byon. ỽylaỽ a|oruc breint megys y|gỽlychaỽd ỽyneb

y|brenhin gan y|dagreu yn|syrthyaỽ. Ac ar hyny kych+

wynu a|oruc y|brenhin. gan tebygu y|mae kawat laỽ.

a drychafel y|ỽyneb. A gỽelet breint yn ỽylaỽ. A gofyn idaỽ

py achaỽs oed idaỽ y|r deissyfic* tristyd hỽnỽ. Ac ar hyny

y dywaỽt breint. Dioer heb ef defnyd ỽylaỽ a|thristyd

yỽ im. Ac y hoỻ genedyl y brytanyeit yn dragywydaỽl

kanys yr yn oes Maelgỽn gỽyned y|mae kenedyl y|bry+

tanyeit heb gaffel vn tywyssaỽc a aỻei eu hamdiffyn

rac estraỽn genedyl. Nac a aỻei eu dỽyn ar eu hen teilyg+

daỽt A|hediỽ y|bychydic a oed o|ymgynhal enrydet. dy

uot titheu yn godef ỻeihau hyny a|e goỻi. kanys ke+

nedyl y|saesson yr hon eiroet drỽy eu brat a|e tỽyỻ a|e

distrywaỽd. Ac weithon mỽyaf oỻ pan ganhatter vdunt

arueru o|goron tywyssogaeth yn yr ynys hon. kanys pan

NLW MS. 3035 (Mostyn 116) – page 134v