Cardiff MS. 3.242 (Hafod 16) – page 16
Llythyr Aristotlys at Alecsander: Pryd a Gwedd Dynion
16
1
Gỽaethaf llygeit yỽ rei y bo manneu gỽynyon neu
2
duon. neu gochyon o bob parth udunt. kanys gỽaeth
3
yỽ y|dyn hỽnnỽ no neb araỻ. Aeleu bleỽaỽc iaỽn a
4
arỽydockaa ymadraỽd tramgỽydus. Y|neb y bo idaỽ
5
aeleu crogedic yn estynnu tu a|e arleisseu; dyn bu+
6
dyr yỽ hỽnnỽ. Y neb y bo idaỽ aeleu teneu kymessur
7
o hyt a|byrder ac ỽynteu yn vaỽr; arỽyd yỽ ethrylith
8
a|dyall. Pỽy|bynnac y|bo idaỽ trỽ·yn ỻym ỻidyaỽc vyd
9
Y|neb y|bo trỽyn hir idaỽ yn estynnu tu a|e eneu; ffe+
10
nedic vyd a gleỽ. Y neb y bo trỽyn byrr. teruysgus
11
vyd. Y neb y bo idaỽ froeneu agoret ỻydan ỻidyaỽc
12
vyd. Y neb y bo idaỽ trỽyn yn|drychafel yn|y genaỽl
13
dywedỽydaỽl vyd a chelwydaỽc. Goreu trỽyn yỽ vn
14
kymedraỽl o|hyt a|ỻet a|e ffroeneu yn vaỽr. ac wy+
15
neb ỻyfyn heb chỽyd yndaỽ. dyn keintachus afre+
16
olus vyd sarhaetgar a budyr. Y neb y bo wyneb
17
kymhedraỽl idaỽ yn troi ar vraster yn|y rudyeu
18
a|e arleisseu; gỽiryon vyd a charedic a|deallus a
19
doeth a|gỽassanaethgar a chỽrteis ac ethrylithrus.
20
Y neb y bo geneu ỻydan; ymladgar vyd a|gleỽ. Y
21
neb y bo gỽeuusseu bras; ynuyt vyd. Y neb y bo
22
idaỽ wyneb cnoedic tyỻaỽc ỻetynuyt vyd ac anghyflyry+
23
us a geuaỽc. Pỽy bynnac y bo wyneb aduein idaỽ;
24
da vyd a charueid ac ethrylithrus. Y|neb y bo wyneb
25
vychan glas idaỽ; drỽc vyd a|gỽydyus a thỽyỻỽr
26
a medỽ. Y neb y bo wyneb hir iaỽn idaỽ; sarhaet+
27
gar vyd. Y neb y bo arleisseu hỽydedic idaỽ; ỻidy+
28
aỽc vyd.
| « p 15 | p 17 » |