BL Additional MS. 19,709 – page 67r
Brut y Brenhinoedd
67r
Arthur a|e lu a gylchynỽys y|dinas ac a|e gvarchetwis
arnaỽ. a gvedy clybot o baldvlf y vravt y warchae.
ef a|gyrchavd tu a|r ỻe yd oed y vravt. a|chwe|mil o
wyr gantaỽ y geissav y rydhau odyno. kanys yr
amser yd ymladyssei arthur a|e vravt ef. yd oed val+
dvlf yna ar lan y|mor yn arhos dyfot cheldric o ger+
mania a oed yn dyfot a|phorth gantaỽ vdunt. ac vrth
hẏnnẏ gvedy y dyfot hyt ar deg|miỻtir y vrth y gaer
darparu a oruc dvyn kyrch nos am ben arthur a|e lu.
ac eissoes nyt ym·gelvys hynny rac arthur. yd erchis
ynteu y kadvr jarỻ kernyv. kymryt wechant march+
avc a their mil o|pedyd y·gyt ac ef. a mynet yn eu
herbyn ac eu ragot y nos honno y ford y doynt. a
gvedy kaffel o gadvr gvybot y ford y|doynt y gelyn+
yon eu kyrchu a oruc kadỽr yn deissyfic* a gvedy
brivav eu bydinoed ac eu hyssigav a|ỻad ỻawered
onadunt. kymeỻ y|saesson a oruc ar fo. ac vrth hyn+
ny diruavr dristyt a gofal a gymerth baldvlf. ac
yn|da vrth na aỻvys geỻỽg y vravt o|r gỽarch+
ae yd oed yndav. a medylyav a oruc py. wed y
gaỻei kaffel kyfrỽch ymdidan a|e vravt. kanys
ef a|tybygei pop vn ohonunt eỻ|deu rydit a gva+
ret yn hoỻavl bei keffynt ymdidant y·gyt. a
gvedy na chaffei ford araỻ yn|y byt. eiỻav y|ben
a|e varyf a oruc. a|chym·ryt telyn yn|y lav. ac yn
rith erestyn a gvaryyd dyfot ym|plith y ỻu a|r
ỻuesteu. a|r klymeu a|r|crychyadeu a ganei ef
| « p 66v | p 67v » |