BL Additional MS. 19,709 – page 61v
Brut y Brenhinoedd
61v
1
ony delhei y|wneuthur iaỽn idaỽ. a heb vn gohir
2
a|r racdywededic irỻoned honno yn parhau y·ry ̷+
3
dunt kynnuỻaỽ ỻu a|oruc y brenhin a|mynet
4
tu a|chernyỽ a|dechreu ỻosgi y|dinassoed a|r ces+
5
tyỻ. ac ny lafassaỽd gỽrlois ymgyfaruot nac
6
ymerbyneit kanys ỻei oed eiryf y|wyr aruaỽc
7
noc ef. ac ỽrth hynnẏ dewissach vu gantaỽ ka ̷+
8
darnhau y gestyỻ hyt pan gaffei ynteu porth o
9
iwerdon. a|chanys mỽyaf oed y ofal a|e pryder am
10
y|wreic noc ymdanav e|hun. ac vrth hynny ef a|do ̷+
11
des y|wreic yg|kasteỻ tindagol yr hỽn a oed osso+
12
dedic y|myỽn y|mor. a hỽnnỽ oed diogelaf a|cha+
13
darnaf amdiffyn ar y|helỽ ynteu. ac efo e|hun a aeth
14
y gastel dimloec rac o|damwein eu kaffel eỻ deu y+
15
gẏt. a gỽedy menegi hynny y|r brenhin kyrchu a
16
oruc ynteu y kasteỻ yd oed ỽrlois yndaỽ ac eisted
17
ỽrthaỽ a gỽarchae pop ford o|r y geỻit dyfot aỻan o ̷ ̷+
18
honaỽ. a gỽedy ỻithraỽ yspeit pytheỽnos. koffau
19
a oruc y breinhin* y garyat ar eigyr a galỽ attaỽ
20
a oruc vlpin o ryt garadaỽc ketymdeith neiỻtu+
21
edic a|chytuarchaỽc idaỽ a|menegi idaỽ mal hyn.
22
ỻosgi yd ỽyf. i. o garyat eigyr heb ef yn gymeint
23
ac nat petrus genhẏf na aỻaf ochlyt perigyl vyg
24
corff ony chaffaf y wreic ỽrth vyg|kygor. ac ỽrth
25
hynny heb ef yd archaf itt gygor o|r hỽn y gaỻỽyf
26
eilenwi vy ewyỻus rac o|damwein o dra gofeileint
27
vy abaỻu. ac ar hynny y|dywaỽt vlpin. arglỽyd heb
| « p 61r | p 62r » |