NLW MS. Peniarth 11 – page 213r

honaỽ ef arnunt ỽy gredu ym pob ỻe yn yr ynys. y trywyr ar|dec

a|doethant o|r casteỻ. ac a|aethant yn ueudwyeit ar hyt y fforestyd

y benydyaỽ eu|kyrff am y gỽan gret a|gynhalyassynt hyt hynny.

P aredur diwarnaỽt a|doeth y ty y brenhin meudỽy y ew+

ythyr yr|hỽnn a|vu lawen ỽrthaỽ. Paredur yna a|dywa+

ỽt y damweineu ryuedaf a gyuaruu ac ef yr pan athoed y ỽr+

thaỽ. a ryued yỽ gennyf arglỽyd ewythyr a|m aniueil gỽynn

bach. ryuedu yd wyf amdanaỽ. a menegi y|r meudỽy y antur

a|oruc. V|arglỽyd nei heb y meudỽy mi a|ỽnn y car duỽ di pan

dangosso ytt y kyfryỽ beth a|hynny. Yr aniueil ufyd bychan a

weleist di a|r deu·dec ki yndi a|arwydockaa iessu grist. a|r deu·dec|ki

a gyffelybir y|r idewon. y rei a greaỽd ef ar y delỽ e hun. a gỽedy

daruot idaỽ ef eu creu ỽy. ef a|e profes ỽynt y edrych pa gymeint

y kerynt ỽy efo. ac a|e hanuones y|r|diffeith yn|y ỻe y buant deu+

geint mlyned heb vỽyt onyt ual yr anuonei ef y manna o|r

nef udunt. nyt oed arnunt neb ryỽ anhyfrydỽch o|r byt. Ac

yna diwarnaỽt ỽynt a|aethant ynghyngor. ac vn onadunt

a|dywaỽt. Pei|ỻidiei duỽ ỽrthym ni a dỽyn y manna y gen+

nym. beth a|wnaeỽch chỽi wedy hynny. ny phery duỽ yn was+

tat. yna ỽynteu a|dywedassant y gỽneynt ystor udunt o|r

manna. ac yna ỽynt a|e kynnuỻassant ac a|e|rodassant yn|y

daear myỽn seleri eu ỻoneit. ac yna duỽ a|weles hynny ac

a|e gỽybu ac a|lidyaỽd ỽrthunt. ac a|duc y manna y ganthunt.

A|phan doethant ỽy y|r seleri y geissyaỽ eu kuduaeu. nyt oed yno

dim onyt seirff a|nadref* A|phan wybuant ỽy sorri o|duỽ ỽrth+

unt ỽynt a aethant pob un yn|y gyfeir ar hyt yr estronyon ~