LlGC Llsgr. 3035 (Mostyn 116) page 168r

kanys kyn|no hyny wedy marỽ merch y moelcỽlỽm y|wreic yd

aruerassei yn wastat o ordechat*. a|phan doeth yr haf rac ỽyneb

y|kyffroes henri vrenhin diruaỽr greulaỽn lu yn erbyn gỽyr

powys nyt amgen maredud vab bledyn ac einaỽn a madaỽc

a Morgan meibon kadỽgaỽn vab bledẏn a|phan glywassant

ỽynte hẏny an·uon kennadeu a orugant at ruffud ap ky+

nan a oed yn kynal ynys von y|eruyneit idaỽ bot yn gyt+

aruoỻ ac ỽynt yn erbyn y brenhin val y geỻynt warchadỽ

yn|di·ofẏn ynyalỽch y|gỽlat ac ynteu drỽy gynhal hedỽch

a|r brenhin a dywaỽt o|foynt hỽy y deruynheu y gyfoeth ef

y|parei y|hyspeilaỽ a|e hanreithaỽ ac y gỽrỽynebei*. a phan ỽybu

veredud a meibon cadỽgaỽn hẏnẏ. kymryt kygor a|wnaethant

ac yn|y kygor y kaỽsant gỽarcgadỽ terfyneu y gỽlat e|hunein

a|hymryt* eu hamdiffẏn yndunt. a|r brenhin a|e luoed a dy+

nessayssant y deruyneu powys. ac yna yd anuones Mare+

dud ap bledẏn ychydic saethydyon ieueinc y gyferbyneit y

brenhin myỽn gỽrthaỻt goedaỽc ynyal ford yd oed yn dy+

fot val y geỻynt a|saetheu ac ergydyeu wneutur kynỽryf

ar y ỻu ac ef a damweinaỽd yn|yr aỽr y|dathoed y gỽyr ieu+

einc hyny y|r ỽrthaỻt dyuot yno y brenhin a|e lu a|r gỽyr

ieueinc hẏnẏ a erbynassant yno y brenhin a|e|lu drỽy dir+

uaỽr gynhỽryf geỻỽg saetheu ym|plith y ỻu a gỽed* ỻad

rei a brathu ereiỻ vn o|r gỽyr ieueinc a dynaỽd yn|y vỽa

ac a eỻygaỽd saeth ym|plith y|ỻu a hono a|dygỽydaỽd yg

kedernit ar·ueu y brenhin yn erbyn a|e gaỻon heb ỽybot

y|r gỽyr a|e byryaỽd ac nyt argywedaỽd y|saeth y|r bren·hin

rac daet yr ar·ueu canys ỻurugaỽc oed namyn freiỻaỽ

a oruc y|saeth drachefyn y ar yr arueu ac ofynhau yn vaỽr

NLW MS. 3035 (Mostyn 116) – page 168r