NLW MS. Llanstephan 4 – page 47v
Purdan Padrig
47v
ac y·dan gỽynaỽ ac erthỽch yn aruthyr
y kerdassant ac y|ducsant y march+
aỽc gyt ac ỽynt. ac ef a|welei rei yn
ymadaỽ a|r rei ereiỻ. Rei amgen oho+
nunt a|ducsant y marchaỽc ygyt
ac ỽynt yn beỻach trỽy vrenhinya ̷+
eth uffern. daear du oed yno a|brenhin+
yaeth dywyỻ. ac ny welei ef dim yno
dyeithyr y diefyl a|oedynt ygyt ac ef
yn|y dỽyn. Gỽynt poeth ˄oed yn chỽythu
yno breid y gaỻei y diodef. ac rac ka+
darnet y gỽynt hỽnnỽ ef a|debygei y
vot yn tyỻu y gorff trỽydaỽ. Wynteu
a|e tynnassant ef yn erbyn y gỽynt
hỽnnỽ parth a|r ỻe y kychỽynnei yr
heul hanner haf. A phan doethant yno
megys y deruyn y|byt y dechreuassant
ymchoelut drachefyn parth a|r deheu. a
thynnu y marchaỽc trỽy gỽm ỻydan
parth a|r ỻe y kyuyt yr heul hanner
y gaeaf a|r asgeỻwynt poeth oc eu hỽy+
neb. A|phan yttoed ef veỻy ef a glyỽei
megys yn gyffredin yr hoỻ daear yn
ỻeuein yn druan ac yn vdaỽ ac yn|kỽ+
ynaỽ. A|phei vỽyaf y nessaei ef yno e+
glurach y clywei y ỻeuein a|r gỽynuan.
| « p 47r | p 48r » |