Cardiff MS. 1.362 (Hafod 1) – page 55r
Brut y Brenhinoedd
55r
1
yr hỽn a ymdywynic yn gỽymp y priaỽt genedyl.
2
Trỽy hỽnnỽ y kyll flandrys y dỽy ynys. Ac o|e hen tei+
3
lygdaỽt yd yspeilir. Odyn* ymchoylant y kiỽdaỽtwyr yr
4
ynnys*. kans aball yr estraỽn genedyl a dỽyrhaa. yr hen
5
gỽyn y ar varch gỽelỽ yn diheu a trossa auon perydon.
6
Ac a|gỽyalen wen a uessur melin arnei. katỽaladyr a
7
eilỽ kynan. ar alban a dỽc yn|y getymdeithas. yna y
8
byd aerua geneloed*. yna llithrant o waet. yna y lla+
9
wenhant mynyded llydaỽ. Ac o|r teyrnwyalen y coronhe+
10
ir y brytanyeit. yna y|llenwir kymry o lewenyd. A che+
11
dernyt kernyỽ a irhaa. O enỽ brutus yd enwir yr ynys.
12
Ac enu yr estronyon a aballa. O gynan y kerda baed
13
ymladgar. yr hỽn a lymhaa blaenwed y danhed o vy+
14
ỽn llỽyneu freinc. kans trecha pop kedernyt mỽyaf. yr
15
rei lliaf* hagen y ryd amdiffyn. hỽnnỽ a offynhaant yr
16
auia ar affrica. kans ruthur y redec ef a ystyn y eitha+
17
uoed yr yspaen. y hỽnnỽ y dynessa bỽch y serchaỽl gas+
18
tell. a baraf aryant idaỽ. a chyrn eur. yr hỽn a chwyth
19
o|e freneu* y veint ỽybren. yny tywyllo ỽyneb yr holl
20
ynnys. hedỽch a uyd yn|y amser ef. Ac o frỽythlonder
21
y tywarchen yd ymlaant yr yteu. A|gỽraged yn eu kerde*+
22
dyant a uydant nadred. a phop cam udunt a lenwir o sy+
23
berỽyt. yna yd atnewydir lluesteu godineb. Ac ny orffo+
24
wyssant saethu kybydiaeth o vrathu; ffynaỽn eilweith
25
a lenwir o waet. a deu vrenhin a|wnant ornest am y lle+
26
wes o ryt y vagyl. Pop gỽeryt a gynheicca. A dynyoly+
27
aeth ny pheit a godineb. Pop peth o hyn teir oes a|e
28
gỽyl. hyny datgwidyer y brenhined cladedic ygkaer
29
lundein. Eilweith yd ymchoel newyn a marwolyaeth y popyl.
| « p 54v | p 55v » |