LlGC Llsgr. 3035 (Mostyn 116) page 155v

gylch petwar gỽyr ar|dec gỽede gỽneuthur claỽd dan y troetheu

yn dirgel heb ỽybot y|geitweit y gasteỻ. ac yna y doeth y|r

casteỻ yd oed gerald a nest y wreic yn|kysgu yndi a|dodi gawr

a|wnaethant yg|kylch y casteỻ ac en·nynu tan yn|y tei ỽrth

y|ỻosgi a|duhunaỽ a oruc gerald pan gigleu yr aỽr. ac yna

y dywaỽt nest ỽrthaỽ na dos aỻan y|r drỽs kanẏs yg|kylch

hyny a|wnaeth ef. a hi a|e harwedaỽd hyt yg|geudy a oed gy+

seỻt·edic ỽrth y casteỻ ac yno megys y|dywedir y|diegis.

a|phan ỽybu nest y dianc ef ỻefein a|oruc a|dywedut ỽrth

y gỽyr a oedynt aỻan beth a lefỽch yn|ofer nyt yttiỽ yma

y|neb a geissỽch neur diegis. a gỽedy eu dyuot ỽynteu

y|myỽn y geissaỽ a orugant ym pop man a gỽedy na|s kaỽssant

dala nest a|wnaethant a|e deu vab a|e merch a mab araỻ y*

idaỽ ynteu o garatwreic. Ac yspeilaỽ y|casteỻ a|e anreithaỽ

a|gỽedy ỻosgi y casteỻ a chynuỻaỽ anreith a chytyaỽ a hi.

ymchoelut a|wnaeth y wlat. Ac nyt yttoed kadỽgaỽn y|tat

ef yn|gedrychaỽl yna yn|y wlat. kanys ef a|athoed y powys

ỽrth hedychu y rei a oedynt yn an·uhyn. ac ywein a athoe+

dynt y|ỽrthaỽ. A|phan gigleu gadỽgaỽn y|gỽeithret hỽnỽ

kymryt yn drỽc arnaỽ gan sorr a|oruc ef hyny o|achaỽs y

treis kyt a|wnathoedit a nest verch rys ac rac ofyn ỻidyaỽ

o henri vrenhin am sarhaet y|estiwarth. Ac yna ymhoelut

a oruc a|cheissaỽ talu y|wreic a|e anreith y|erald ystiwart

drachefyn y|gan ywein ac nys cafas. Ac yna o|ystryỽ y|wreic

a|oed yn dywedut ỽrth ywin val hẏn o myny vyg|kael i

tat o draserch a|charyat y|wreic y geỻygaỽd y blant y|r|ystiwart

NLW MS. 3035 (Mostyn 116) – page 155v