Llsgr. Caerdydd 3.242 (Hafod 16) page 98

a|e yfet. prouedic yỽ. Rac ỻosc ar nebryỽ aelaỽt; kymer

wreid y liliỽm gỽynn. a golch yn|da. a berỽ yn ffest drỽy

dỽfyr. ac odyna briỽ yn van. a chymysc ac oleỽ ac ychydic

o|wynn·ỽy. a|gossot ỽrthaỽ y bore a|r nos. ac·at·vo mỽyaf

o|r plastyr hỽnnỽ goreu vyd. Araỻ yỽ; ỻosc risc eidorỽc yn

ỻe glan a bỽrỽ arnaỽ y ỻudỽ hỽnnỽ a|hynny a|e gỽna yn

iach. Araỻ yỽ; ỻosgi redyn a chymyscu y ỻudỽ hỽnnỽ a

gỽynn·wy neu oleỽ a|e eliaỽ a hỽnnỽ. a hynny a|e gỽna

yn iach yn ebrỽyd ac yn enryued. ~ ~ ~

M Edeginyaeth|rac y tan gỽyỻt; sef yỽ hỽnnỽ y kic

drỽc ual|nat ymdangosso erbyn y trydyd dyd; ky+

mer. gaỽs da a|mortera yn ffest a chymysc a mel yny vo

gloeỽ. ac ir ac ef yn vynych a|dot arnaỽ deil y kaỽl. ac ny

welir dim o·honaỽ erbyn y tridieu. Rac brath ki kyn+

deiraỽc; mortera yr eidral a blonec ygyt. neu vortera gen+

nin a gỽinegyr. neu hat fenigyl a|mel. a dot ỽrthaỽ.

Rac dolur bronneu.. mortera wreid y gronỻys a hen

vlonec a dot ỽrthaỽ. Y|r neb a|goỻo y synhỽyr; kymer

lygeit y|dyd. a|r bryton. a|r saluia. id est. saygh a tharaỽ ar

win a|dyro y|r|claf y yfet bymtheg nieu. Rac y|parlis;

kymer. irvrỽyn a mortera a hidyl eu sud ar amkan ffioleit

vechan. a|dyro y|r claf y yfet yng|gwaỽr·dyd duỽ nadolic.

O|r byd gỽreic heb aỻel esgor; kymeret deil y ganwreid a

rỽymet ỽrth y mordỽyt assỽ a|thynn yn|ebrỽyd gỽedy

esgoro rac tywaỻt y hamysgar. Rac chỽyd a|dolur yn|y

gliny eu ;briỽ rut a|mel a halen a dot ỽrthaỽ. a hynny

a weryt yr chỽyd. Rac dolur arenneu; taraỽ y centori ar

Cardiff MS. 3.242 (Hafod 16) – page 98