Cardiff MS. 1.362 (Hafod 1) – page 63r
Brut y Brenhinoedd
63r
id yd ymgynyllassant gỽedy hynny. Ac ym+
lith hynny eissoes yd oed eidol a|e holl vryt
yn ymgeissaỽ a hengyst y ymỽybot ac ef.
AC eissoes o|r diwed val yd oed y bydino+
ed yn ymfust. Ac yn ymgymynu blith tra
chymysc. yd ymgauas eidol a hengyst y gyt.
Ac ymgyuogi ar cledyfeu a wnaethant. yna y
gellit gỽelet deu ymladỽr yn ragori rac paỽb.
yna y gỽelit y tanllychar yn esceinaỽ o|r arueu
y gantunt megys myllt ymlaen taran. A hir
y buant yn ymlad heb ỽbot* pỽy a orffei. Ac ual
yd|oydynt uelly. nachaf gorleis iarll kernyỽ
yn dyuot ar vydin yd oed yn|y llywyaỽ. Ac yn
gỽascaru y elynyon yn diannot. A phan welas
eidol hynny. kymryt hengyst a oruc herwyd
barfle y penfestyn ac arueru o|e holl nerthoed.
A|e tynnu gantaỽ hyt ym perued kedernyt y
gytuarchgyon* e hun. A gỽedy y|dyuot hyt y+
no; gan oruchel lef y dywot val hyn. A wyr+
da heb ef a eilenwis vyn damunet. i. kywarsse+
gỽch y bratỽyr tỽyllwyr. kans yn aỽch llaỽ y
mae y uudugolyaeth ar goruot. Pan oruuỽyt
ar hengyst. O hynny allan bỽrỽ y saesson oc eu
llad ac eu daly a wnaethant hyny gaỽssant y
uudugolyaeth. Ac ar hynny gỽascaru a wna+
ethant y ssaesson. Ac adaỽ y maes yn dybryt.
A ffo paỽb o·nadunt megys y harwedei y tyg+
hetuen. rei yr koydyd. ereill yr kestyll. ereill
y eu llogeu. Ac yna yd aeth octa mab hengyst
| « p 62v | p 63v » |