LlGC Llsgr. 3035 (Mostyn 116) page 73r

Ac yn|y ystyryaỽ o|e hoỻ diheỽyt. Damwein truan

hefẏt a|r daroed yr varỽ henhafgỽyr yn ỻỽyr.

megys nat oed vn gỽr mor arbenic a gỽrtheyrn

A|Megys meibon oed paỽb o|wyrda y|teyrnas oỻ

y ỽrthaỽ ef Ac euo a gaffei enrydet paỽb onadunt

ỽy kanys ef a vydei eu kygor. A gỽedy gỽelet o

ỽrtheyrn y vot yn kaffel pop peth ỽrth y ewyỻus

Medylyaỽ a oruc o|e hoỻ ethrylith py|wed y gaỻei

diot constans vynach o|e vrenhinyaeth a|e chymrẏt

idaỽ e|hun. Ac yna y kymerth y sỽỻt a|e dressor a|r

kestyỻ a|r kaeroed a|r dinassoed kadarn yn|y ve+

dyant e|hun gan venegi y|r brenhin bot dygyfor

ỻuyd am eu pen o|r y ynysset. A gỽedy kaffel o·honaỽ

y gan y brenhin pop peth ỽrth y vynhu. gossot a

wnaeth y anỽylyt e|hun a|e diwẏdyon y warcha+

dỽ y ỻeoed. Ac odyna medylyaỽ a oruc py wed

yd ystrywei vrat y brenhin. A|dywedut ỽrth cons+

tans val hyn. Arglỽyd heb ef. reit yỽ itti achwa+

negu dy deulu mal y bo di·bryderach it. Ac ehof+

nach rac dy|elynyon. Ac yna y dywaỽt Constans

ponyt y|th laỽ ti heb ef y rodeis. i. hoỻ vedyant

a|ỻywodraeth y teyrnas. Ac ỽrth hyny gỽna ditheu

pop peth o|r a vynych gan gadỽ fydlonder i|mineu

Ac yna y dywaỽt gỽrtheyrn. ef a|r dywespỽyt imi

heb ef bot y fichteit yn mynu dỽyn gỽyr llychlyn

a denmarc yn vn ac ỽynt ỽrth ryfelu arnam ni

Ac ỽrth hynẏ y|kyghoraf|i itti gỽahaỽd rei o·nadunt

ỽynteu yn wyr itti. Ac y|th lys yn wastat mal

y|bont kymheruedwyr y·rot ti ac eu kenedyl. mal

y gaỻont whedlau it a gỽybot medỽl eu kenedyl

NLW MS. 3035 (Mostyn 116) – page 73r