NLW MS. Peniarth 18 – page 24v
Brut y Tywysogion
24v
1
y llas rickert vab gilbert y|gan Vorgan ap yỽein.
2
wedy hynny y kyffroes yỽein a|chatỽaladyr. Mei+
3
bon Gruffud ap kynan diruaỽr greulaỽn lu y|ge+
4
redigyaỽn. y gỽyr a oedynt degỽch yr holl vrytan+
5
yeit a|e diogelỽch a|e kedernit a|e rydit. y gỽyr a o+
6
edynt deu ardyrchaỽc urenhined a deu haelon. deu
7
diofyn deuleỽ deỽron. Deu detỽydyon. Deu huodron.
8
Deu doethon. Diogelỽyr yr eglỽysseu a|e hardelỽyr.
9
ac amdiffynỽyr y|tlodyon. llofrudyon y gelynyon.
10
hedychỽyr y|rei ymladgar. dofyotron y gỽrthynneb+
11
wyr. y digelaf* naỽd y baỽb o|r a foei attunt. y|gỽyr
12
a|oedynt yn racrymhau o nerthoed eneideu a|chyrff.
13
ac yn kyt·gynhal yn vn holl deyrnas y brytanyeit
14
Y|rei hynny ar y ruthyr gyntaf a losgassant gastell
15
gỽallter. ac odyna ỽedy kyffroi y hadaned yr ymla+
16
dassant a chastell aber ystỽyth ac y|llosgassant. a chyt
17
a howel ap Meredud. a Madaỽc ap Jtnerth. a|deu vab
18
hyỽel. nyt amgen Maredud a rys y llosgassant cas+
19
tell rikert dylamar a|chastell dinyrth. a|chastell caer
20
wedros. ac odyno yr ymhoelassant adref. yn diỽed
21
y ulỽydyn honno y doethant eilỽeith y|geredigyaỽn
22
a|chyt ac ỽynt amylder llu o|detholedigyon ymladỽyr
23
val am·gylch whe mil o bedyt aduỽyn a dỽy vil o|var+
24
chogyon llurugaỽc deỽraf a|pharotaf y ymlad. ac yn
25
borth vdunt y doeth Gruffud ap rys. a|howel ap Meredud
26
o vrecheinaỽc. a Madaỽc ap Jtnerth a deu vab howel
| « p 24r | p 25r » |