NLW MS. Peniarth 11 – page 118v

du yr hỽnn a|oed yn ỻosgi. A|ryued oed ganthaỽ nat yttoed wedy

torri. rac meint y dyrnaỽt a gymerassei y ganthaỽ. a thy·byaỽ

a|wnaeth y vot yn gythreul. Ar|hynny nachaf y marchaỽc du

yn dyuot heb vynnu gadel arthur ueỻy. namyn o nerth traet y

varch y gyrchu a|wnaeth. ac ym·gudyaỽ a|oruc arthur y|ngwasga+

ỽt y daryan rac ouyn y fflam. ac erbynnyeit y marchaỽc du

a|oruc. ac a|e waeỽ y daraỽ drỽy y daryan. yny vyd y|marchaỽc

yn torsteinyaỽ ar bedrein y uarch. ac o nerth a grym ym·gyuo+

di yn|y gyfrỽy. a chyrchu arthur a|wnaeth ef. a thrỽy y lit y daraỽ

a|e waeỽ drỽy berued y breich assỽ idaỽ. a phan gigleu arthur y

vrathu. ỻidiaỽ a|oruc yn vỽy no meint. a|r marchaỽc du a|vu la+

wen ganthaỽ pan wybu vriwaỽ arthur. Y brenhin a|weles y gỽaeỽ

gỽed* diffodi a ryued vu ganthaỽ hynny. Ac yna y marchaỽc

du a|erchis naỽd y|r brenhin. ac a|dywaỽt ual hynn. arglỽyd ar+

thur. ny diffodassei vyng|gỽaeỽ i vyth o·ny|bei gael ohonaỽ enne+

int yn dy waet ti. Ac yna y dywaỽt arthur ỽrth y gỽr du. Ny ro duỽ

ymi ymi* naỽd heb ef os myui a ryd naỽd ytti nes dial yr hynn

a|aỻỽyf arnat. Yna arthur a|ymgyffroes y tu ac attaỽ. ac o nerth

traet y varch y gyrchu a|e daraỽ a|e waeỽ ym|perued y dỽyvronn

yny vyd ef a|e varch y|r ỻaỽr ac ual|kyhyt a|ỻath o|r gỽaeỽ trỽyd+

aỽ. ac odyna tynnv y waeỽ attaỽ a|e adaỽ ynteu yn uarỽ a|chyr+

chu y fford e|hun a|oruc arthur. ac mal y|byd yn|dyuot ueỻy ef a

glywei godỽrd marchogyon yn|dyuot drỽy y fforest. ac yna ym+

choelut a|oruc ynteu ac arganuot yngkylch ugein neu a|uei

vỽy o varchogyon yn|dyuot parth a|r|ỻannerch yn|y ỻe yd|oed

y marchaỽc marỽ. ac ynteu a|doeth hyt y barr. ac ac ef yn|dyuot