NLW MS. 3036 (Mostyn 117) – page 204
Brut y Brenhinoedd
204
1
yn ffreinc. A guedy eu dyuot y tir ffreinc dechreu an+
2
reithaỽ y| guladoed o pop parth udunt. Ac yn yr am+
3
ser hỽnnỽ yd oed ffrolo yn tywyssaỽc ar ffreinc dan
4
les amheraỽdyr rufein yn| y llywyaỽ yn| trethaỽl
5
y danaỽ. A guedy clybot o ffrolo dyuotedigaeth ar+
6
thur ac yd oed yn| y wneuthur ar ffreinc. kynnull+
7
aỽ holl uarchogyon aruaỽc ffreinc. A dyuot yn er+
8
byn arthur. Ac ny allaỽd seuyll yn| y erbyn. kanys
9
kymeint oed lu arthur ac nat oed haỽd eu riuaỽ.
10
y·rỽg ynys prydein a|r ynyssoed ereill a orescenys+
11
sei. A ran oreu o vilwyr ffreinc oed gyt ac ef heuyt.
12
A guedy guelet o ffrolo y syrthyaỽ yn| y ran waethaf
13
o|r ymlad. Adaỽ y maes a oruc. Ac ygyt ac ychydic
14
o nifer kyrchu paris. A guedy ymgynnullaỽ y
15
wascaredic pobyl attaỽ. kadarnhau y| dinas arnaỽ
16
a| oruc a mynnu y| gynhal yn erbyn arthur. A thra
17
yttoed ffrolo yn arhos y porth attaỽ. nachaf arthur
18
yn deissyuyt yn dyuot am pen y gaer. Ac
19
yn rannu y lu yn| y chylch mal na cheffynt dyuot o+
20
honei namyn ỽrth y gyghor ef. Ac ar pen y mis sef
21
a| wnaeth ffrolo doluryaỽ o welet y pobyl yn merwi
22
o newyn. Sef a wnaeth anuon ar arthur y ofyn idaỽ
23
A uynnei eu dyuot ell deu y le ny allei neb ganhorth+
24
ỽy y vn o·nadunt mỽy noe gilyd. Ar vn a orffei. kym+
25
erhei gyuoeth y llall a|e wyr yn diymlad yr deu lu.
26
Sef achaỽs y kynnigỽys hynny. Gỽr maỽr aruthyr
27
oed ffrolo ac anueitraỽl y| deỽred a|e gedernyt a|e leỽder.
| « p 203 | p 205 » |