NLW MS. 3035 (Mostyn 116) – page 97v
Brut y Brenhinoedd
97v
1
ar ynys prydein oỻ. Ti a|arỽydocca y|seren a|r tanaỽl dreic
2
y·dan y seren. Y paladẏr a ystyn parth a freinc hỽn a arỽyd+
3
occa mab kyfoethaỽc a vyd itt. A chyfoeth hỽnỽ a|e vedy+
4
ant a amdiffyn y|teyrnassoed ac a vydant ydanaỽ yn hoỻ+
5
aỽl. Y|paladyr araỻ a ystyn parth mor jwerdon a arỽydocca
6
merch a vyd itt a meibon hono a|e hỽyron a vydant* pop
7
eil·wers teyrnas ynys prydein. ~ ~
8
A c val yd oed vthur yn petrussaỽ ae gỽir ae kelwyd
9
a dywedassei. vyrdin am y|seren megys y darparyssei
10
kyrchu parth a|r ỻe yd oed y elyon* a oruc. A gỽedy y dyuot
11
hyt ger ỻaỽ mynyỽ. Ac nat oed namyn ymdeith hanner
12
dyd y·rydunt. A gỽybot o|pascen a giỻamỽri a|r saesson eu bot
13
yn dyfot ỽynt a aethant yn eu herbyn A gỽedy eu dyuot
14
hyt pan ymwelsant o pop tu. ỽynt a ossodassant eu bydinoed
15
ac a dechreuassant ymlad. A|r marchogyon o|pop parth a|las
16
megys y deruyd yn|y kyfryỽ damwein hỽnỽ. Ac o|r diwed
17
gỽedy treulaỽ ỻawer o|r dyd. goruot a oruc vthur A|dechreu
18
fo a|wnaethant y|gelynyon parth a|e ỻogeu gỽedy ỻad pas+
19
cen a giỻamỽri. Ac eu hymlit a|wnaeth y kiỽdaỽtwyr ac
20
eu ỻad ar eu fo. A|r vudugolyaeth a|dygỽydỽys yn ỻaỽ y|ty+
21
wyssaỽc A christ yn|y ganhorthỽyaỽ A gỽedy y veint ladua
22
hono. Megys y gaỻỽys gyntaf. ef a aeth parth a|chaer wynt
23
kanys kenadeu a dathoedynt attaỽ y venegi dygỽyde+
24
digaeth y brenhin a|r daruot y|r archescob a|r escyb a|r aba+
25
deu y teyrnas y gladu ger ỻaỽ manachloc ambyr y|myỽn
26
kor y keỽri. Yr hỽn a barassei y wneuthur hyt tra yttoed
27
yn vyỽ. kanys pan glyỽssant ỽy y varỽolyaeth ef yd ym+
28
gyn·uỻyssynt yr escyb a|r abadeu a|r yscolheigon yr hoỻ
29
teyrnas megys y dylyynt ỽrth arỽylant gỽr kymeint
30
y vrdas a hỽnỽ. kanys yn|y vywyt y gorchymynassei ef y
| « p 97r | p 98r » |