NLW MS. 3036 (Mostyn 117) – page 71
Brut y Brenhinoedd
71
1
Ac yna rac ofyn auarỽy; arafhau a|wnaeth vlkessar.
2
A thagnouedu a|chaswallaỽn. A chymryt teyrnget
3
o ynys prydein pop blỽydyn y gantaỽ. Sef oed meint
4
y|teyrnget; teir mil o punhoed o aryant lloegyr.
5
Ac yna yd aethant yn getymdeithon vlkessar a chas+
6
wallaỽn vab beli. Ac y rodes pop vn y gilyd rodyon
7
maỽrweirthaỽc o eur ac aryant a|thlysseu maỽrweir+
8
thaỽc. Ac y bu vlkessar y gayaf hỽnnỽ yn ynys pry+
9
dein. A drechreu* y|guanhỽyn y kychwynỽys parth
10
a ffreinc. Ac ym pen yspeit o amser; kynnullaỽ llu
11
maỽr a wnaeth vlkessar. Ac a|r llu hỽnnỽ yd aeth ef
12
parth a rufein yn erbyn pompeius y|gỽr a oed yn
13
lle amheraỽdyr yn yr amser hỽnnỽ yn daly yn|y er+
14
byn ynteu. A chany perthyn ar an defnyd ni traethu
15
o weithredoed guyr rufein yn·y bo ebryuygedic y
16
rei hynny; yd ymhoelỽn ar an traethaỽt nu hune+
17
in. Ac ym pen y seith mlyned guedy mynet vlkes+
18
sar o ynys prydein y bu uarỽ kaswallaỽn. Ac y cladỽ+
19
yt yg kaer efraỽc gan vrenhinyaỽl arỽylyant.
20
AC yn ol kaswallaỽn y|gỽnaethpỽyt teneuan
21
uab llud yn vrenhin. kanys auarỽy a|r atho+
22
ed y rufein gyt ac vl·kessar. A hỽnnỽ a traethỽys
23
y teyrnas trỽy hedỽch a|thagneued. Gỽr deỽr oed
24
teneuan. Ac a garei gỽiryoned. a chyfyaỽnder.
25
A Guedy marỽ teneuan y gunaethpỽyt kyn+
26
uelyn y vab ynteu yn vrenhin. Marchaỽc
27
gỽychyr trybelit oed hỽnnỽ. Ac a uagassei amheraỽ+
28
dyr
| « p 70 | p 72 » |