NLW MS. Peniarth 11 – page 150r
Ystoriau Saint Greal
150r
1
hỽnn a|daroed y enax amheraỽdyr o ruuein y ossot arnaỽ.
2
A gỽedy hynny ef a|beris y tynnu aỻan. ac yr aỽr y tynnỽyt yr
3
oed yn waetlyt kanys hanner dyd e|hun oed. Ac ueỻy y pe+
4
rit daly y cledyf geyr bronn gỽalchmei. yny aed yr|aỽr hei+
5
byaỽ. ac yny vyd ynteu yn gyn|wyrdloewet. a|r maen a el+
6
wir esmeraud. Gỽalchmei a|edrychaỽd arnaỽ yn hir.
7
R Yued uu gan walchmei gỽelet y cledyf yn gy·hyt
8
a|r cledyf hỽyaf odieithyr y|wein. A|phan roet ef
9
yn|y wein nyt oed hỽy ef no dỽy rychwant. a unbenn ~
10
heb y brenhin y cledyf hỽnn a rodaf|i ytti. a|mi a|th wnaf he ̷+
11
uyt yn vodlaỽn. Arglỽyd heb·y gỽalchmei mi a|wnaf hyn+
12
ny yn ỻawen. ar hynny yr idewon a|dangossassant idaỽ y
13
fford y dlyei vynet. Ac ar hynny gỽalchmei a gerdaỽd
14
racdaỽ dan ymorchymyn y duỽ. a|r|idewon a|wediassant
15
y·gyt ac ef. herwyd eu cret ỽyntỽy ar y dyuot dra|e|geuyn
16
drỽy lewenyd. a marchogaeth a|oruc gỽalchmei yny doeth
17
y vynyd maỽr yr hỽnn a|oed yn damgylchynu y wlat yr
18
honn a|daroed y|r kaỽr y diua. Ac yno yd oed ef yn gyme+
19
int ac yn gyn greulonet. ac nat oed arnaỽ o·vyn neb o|r
20
byt. a|r fford yr eit attaỽ oed gyn gyuynghet ac na aỻei neb
21
o|r byt o*|r* byt* ar varch vynet idi. Ac yna y goruv ar walch+
22
mei disgynnv a cherdet ar y|draet ar draỽs mein ỻymyon.
23
yny doeth y|r tir gỽastat. ac edrych o|e vlaen a|oruc ef ac
24
arganuot ry˄ỽ gyuanned. ac yn ymyl hynny ef a|welei y
25
kaỽr yn|eisted. ef a|r mab dan vric prenn. Gỽalchmei a|do+
26
eth tu ac yno. a|phan|weles ef walchmei yn dyuot. ef a
| « p 149v | p 150v » |