NLW MS. 3036 (Mostyn 117) – page 114
Brut y Brenhinoedd
114
1
heb arwein rufeinhaỽl geithiwet arnaỽ. gan talu
2
teyrnget udunt o·honei. Ac ỽrth hynny ỽrda heb
3
ef pỽy ny bei well gantaỽ kyuoeth bychan yn y lle
4
arall yn ryd. a heb geithiwet. noc vn maỽr yn|y
5
lle y bei y|dylyet gan tragywydaỽl geithiwet. Ac
6
eissoes heb ef. kanys yr ynys a dywedy ti a uu eid ̷+
7
unt vy rieni inheu. minheu a|rodaf yn ganhorth ̷+
8
ỽy itti gustenhin vym braỽt a dỽy vil o varchogy+
9
on y gyt ac ef y edrych a|uynho duỽ idaỽ gallu rydhau
10
yr ynys honno y|gan ormes estronyon genedloed
11
agkyfyeith. A chymeret ef goron y teyrnas. A bit
12
vrenhin yno o myn duỽ y|ganhadu idaỽ. A rac by+
13
gỽth y ryuel yssyd arnaf inheu y|gan ffreinc. nyt
14
adaỽaf i yr aỽr hon o varchogyon itti mỽy no hyn+
15
ny. Abreid uu o daruu y|r brenhin teruynu y yma+
16
draỽd pan rodes kuhelyn archescob llawer o dioly+
17
cheu idaỽ am hynny. Ac yn|y lle galỽ custenhin. A dy+
18
wedut ỽrthaỽ val hyn. Crist heb ef a oruyd. Crist
19
a wledycha. Crist a orchyuycca. llyma vrenhin yn+
20
ys prydein diffeith. Crist a|e canhorthỽyo. llyma
21
an hamdiffyn ni ac an gobeith ac an llewenyd ni.
22
Beth guedy hynny; yn|y lle guedy bot yn paraỽt
23
y llogeu ar y traeth. ethol y marchogyon ac eu rifaỽ.
24
Ac eu rodi y|guhelyn archescob llundein.
25
AC yn diannot guedy bot pop peth oc eu kyfre+
26
ideu yn paraỽt. kychwyn ar y mor a wnaeth ̷+
27
ant. A dyuot y porth tỽtneis y|r tir. Ac yn diannot
| « p 113 | p 115 » |