LlGC Llsgr. 3035 (Mostyn 116) page 159v

idaỽ dyfot attaỽ ac ynteu a deuth a|r brenhin a dywaỽt ỽrthaỽ

yd oedut yn wastat yn keissaỽ genyf ran o|tir y brytanyeit

Mi a|rodaf it yr aỽr hon tir kadỽgaỽn dos a gỽereskyn. ac yna

y|kymerth yn ỻawen y gan y brenhin. ac yna gan gynuỻaỽ ỻu

gyt a|e getymdeithon y deuth hyt yg|keredigyaỽn ac y gỽe+

rysgynaỽd ac yd a·deilaỽd deu gasteỻ yndi. nyt amgen vn

gyferbyn a ỻan badarn yn ymyl aber yr afon a elwir ystỽyth

a|r ỻaỻ gyr ỻaỽ aber teifi yn|y ỻe a|elwir dingereint y ỻe

y grỽndwalassei roger jarỻ kyn|no hyny gasteỻ. a gỽedy ychy+

dic o amser yd ymchoelaỽd Madaỽc ap ridit o jwerdon heb

aỻel godef andynolyon voesseu y gỽydyl. ac ywein a drigy+

aỽd yno yn y|ol dalam o amser. a Madaỽc a aeth y|bowys. ac nyt

aruoỻet nac yn|hegar nac yn drugaraỽc y gan joruerth y

ewyrthyr* rac y gynal yn gylus y|gan y brenhin. herwyd kyfreith

a drychweithret ot ym·gyffredinei a|e nei o dim. ac ynteu

yn wibiaỽdẏr a lechaỽd hỽnt ac yma. gan ochel gytrychol+

der Joruerth Joruerth a|wnaeth kyfreith hyt na bei a veidei

dywedut ỽrthaỽ ef dim am vadaỽc na menegi dim ym·da+

naỽ gỽelit na|welit. Yg|kyfrỽg hẏnẏ ar·uaethu a|wnaeth

Madaỽc gỽneuthur brat joruerth y|ewythẏr a dala kyfeiỻ+

ach a oruc a|ỻywarch ap trahayarn ac ymaruoỻ y·gyt a|wna+

ethant yn dirgeledic ac eissoes y|r teruyn honỽ* y deuthant

Y vlỽydyn raỽc* ỽyneb y paratoes Madaỽc vrat joruerth

a cheissaỽ amser a|chfle* a|wnaeth y gyflenwi y ewyỻus

a|phan ymhoelaỽd Joruerth y|gaer einaỽn y|kyrchaỽd Madaỽc

a|chytymdeithon ỻywarch y·gyt ac ef yn borth idaỽ kyrch nos

am ben Joruerth a dodi gaỽr a orugant yg|kylch y|ty ỻe yd oed Joruerth

a dyhunaỽ a|wnaeth Joruerth gan yr aỽr. a chadỽ y|ty arnaỽ ef a|e

NLW MS. 3035 (Mostyn 116) – page 159v