NLW MS. Llanstephan 27 (The Red Book of Talgarth) – page 117v
Efengyl Nicodemus
117v
1
duỽ a|wnaethant. ac eu dwyn y gaerussalem y eglỽys yr Jdew+
2
on. a chaev y drysseu a|dwyn ỻyfreu y dedyf. ac eu rodi yn eu
3
ỻaỽ. ac yn enỽ duỽ erchi udunt trỽy duỽ moẏsen ac aaron
4
a|thrỽy duỽ yr israel. yr|hỽnn a|gyuarchaỽd yn tateu ni trỽy
5
dedyf y proffỽydi dywedỽch chỽi ynni. ae crist yỽ yr hỽnn
6
a|ch kyuodes chỽi o veirỽ. a phan|glyỽssant barinus a leỽn+
7
cius eu tynghedu yn enỽ duỽ. crynu eu kyrff a|orugant
8
a|chan erthychu oc eu callonneu. a|chan dyrchafel eu hỽy+
9
neb ar y nef. a dodi arwyd y groc ac eu|dwylaỽ ar eu tauo+
10
deu. ac ygyt dywedut eỻ deu. Rodỽch chỽi y bop vn ohonam
11
ni baỽp y rol o uemrỽn. a ninneu a yscriuennỽn y chỽi y
12
petheu a|welsam ac a|glyỽssam. Ac yna y rodet rol y bop un
13
o·honunt. ac eisted a|orugant ac yscriuennu. a dywedut ual
14
hynn. Jessu grist arglỽyd duỽ byỽ. buched a chyuotedigaeth
15
y rei meirỽ. Kanhatta ynni dywedut y rinwedeu a|lauuryeist
16
di trỽy angeu dy groc. kanys yn tyngu ni a|wnaethpỽyt trỽy
17
dy enỽ kyssegredic di. kany ercheist arglỽyd y|th weissyon na
18
dywettynt y neb dirgeledigaetheu dy dwyỽolyaeth di. a|wnae+
19
thost yn uffern. Ac ual yr|oedem ninneu yno ygyt a|n|tadeu
20
yn|tywyỻỽch anodun. nachaf gỽres eureit yr|heul yn echtywyn+
21
nygu arnam. a ỻawenhau yna o|baỽp o genedyl adaf yn tat
22
ni. a|r padrieirch a|r proffỽydi. a dywedut y goleuat hỽnn
23
yỽ aỽdur y oleuat tragyỽydaỽl. a hynny a|lefaỽd ẏsaias brof+
24
fỽyt ac a|dywaỽt. Hỽnn yỽ goleuat a|ỻeuuer y dat mab
25
duỽ ual y hedewis heb|ef tra vum ar y daear yn vyỽ. Daear
26
zabulon. a daear neptalim. dros eurdonen yn aruordir yr
27
pobloed a|oed yn eisted yn|tywyỻỽch angeu yd echtywynnycka
| « p 117r | p 118r » |