Cardiff MS. 1.362 (Hafod 1) – page 22v
Brut y Brenhinoedd
22v
A gỽneuthur iaỽnder a phaỽb. A phan vu va+
rỽ y cladỽyt yg kaer lyR.
AC yna eilweith y deuth elidyr yn vrenhin.
Ac ym pen rynnaỽd y kyuodes ywein a
pheredur y deu vroder ieuaf yn eu erbyn.
A gỽedy ymlad ac ef. daly elidyr a|e dodi yn
llundein ygkarchar. A ranu yr ynys y redunt. nyt
amgen lloegyr a chymry y ewein. ar gogled y pe+
redur. Ac ym pen seith mlyned y bu varỽ ywein.
Ac y|deuth y kyuoeth yn llaỽ peredur. Ac ym pen
yspeit gỽedy hynny y bu varỽ peredur. Ac yna
y doeth elidyr y tryded weith yn vrenhin. A phan
aeth o|r byt hỽn. yd edewis agreiffeu da yn|y ol.
A gỽedy marỽ elidyr. y doeth rys mab gorbo+
niaỽn. A hỽnnỽ a delis yn ol gỽeithredoed elidyr
y wneuthur o gỽbyl; A gỽe* marỽ rys. y doeth
Morgan vab arthal. A hỽnnỽ o dysc y rieni
a|wnaeth iaỽnder. A gỽedy marỽ morgan. y doeth
einyaỽn y vraỽt ynteu. A phellau a oruc yn+
teu y ỽrth weithredoed y vravt. Ac am eu
greulonder y byrỽyt ef y chwechet vlỽydyn
o|e teyrnas. Ac yna y|doeth idwal vab ywein
y geuynderỽ ynteu y vrenhin. A hỽnnỽ a
wnaeth iaỽnder rac ofyn damwein eyniaỽn.
Ac yn ol idỽal y doeth Run vab peredur. Ac yn
ol Run y doeth Gereint vab elidyr. Ac yn ol
Gereint. y doeth kadell y vab ynteu. Ac yn ol
kadell. y doeth coel. Ac yn koel y doeth porrex. Ac
y porrex y bu tri meib. ffulgen. ac idỽal. Ac
| « p 22r | p 23r » |