NLW MS. 3035 (Mostyn 116) – page 140v
Brut y Brenhinoedd
140v
1
eu ỻywodraeth ar ynys prydein. Ac y|dechrewis y|saesson y gỽledychu
2
Ac yna gỽedy ỻithraỽ rynaỽd o amser heibyaỽ. Ac ym+
3
gadarnhau o|r racdywededic bobyl hono yna. koffau
4
a oruc katwaladyr y deyrnas gỽedy peidaỽ y vaỻ a|r
5
trueni a|r uuassei y·ndi vn vlỽydyn ar|dec A|dyfot hyt
6
ar alan a oruc y a·dolỽyn porth idaỽ y geissaỽ kynydu
7
y gyfoeth idaỽ drachefyn A gỽedy adaỽ o alan idaỽ
8
borth hyt tra yttoed yn paratoi ỻyges. ef a|deuth agyl+
9
yaỽl lef y gan duỽ y erchi idaỽ peidaỽ a|e darpar am
10
ynys. prydein. kany mynei duỽ gỽledychu o|r brytanyeit yn
11
yr ynys a vei hỽy hyt pan delhei yr amser tyghetuenaỽl
12
a brofỽydỽys myrdin Ac y·gyt a hyny. y ỻef dỽywaỽl
13
hỽnỽ a erchis idaỽ vynet hyt yn rufein hyt at sergius
14
bab. A|phan darffei idaỽ kỽplau y benyt; ef a|rifyt ym
15
plith y seint Ac ef a dywedei y ỻef. trỽy efyrỻit y ffyd
16
ef y keffynt y brytanyeit o|r diwed yr ynys. Pan del+
17
hei yr amser tyghetuenaỽd*. Ac ny bydei gynt hyny
18
no phan geffynt ỽy escyrnt* katwaladyr o rufein Ac
19
eu dỽyn hyt yn ynys. prydein. A hyny o|r diwed a vyd pan
20
dan·gosser esgyrn y|seint ereiỻ a gudir rac ofyn y
21
paganyeit Ac yna y kaffant y brytanyeit yr ynys
22
a goỻassant. A gỽedy menegi hyny y|gatwaladyr
23
ynteu yn|y ỻe a deuth at alan vrenhin y venegi idaỽ
24
yr hyn a dywedassei yr agel ỽrthaỽ Ac yna y kymerth
25
alan amryfaelon lyfreu o|profỽydolyaeth yr eryr
26
a|profỽydỽys yg|kaer septon. Ac o gathleu sibli. a phro+
27
fỽydolyaeth vyrdin emrys Ac edrych pop rei o hunut*
28
y etrych a gyttuunynt a gỽeledigaeth gatwaladyr
29
A gỽedy gỽelet o·honaỽ pop peth o|r rei hyny yn kyt+
30
gerdet a|e gilyd Anoc a|oruc y gatwaladyr vfydhau
| « p 140r | p 141r » |