Cardiff MS. 1.362 (Hafod 1) – page 80r
Brut y Brenhinoedd
80r
1
doed hynny. Ac yd oed yn y heidun kyn dyuot y sa+
2
esson y eu gỽarescyn. Ac yna y rodes arthur y aron
3
vab kynuarch brenhinaeth yscotlont. Ac y leỽ vab
4
kynarch jarllaeth lodoneis dan y pherthyneu. kans
5
yn oes emrys y rodassit anna verch uthyr pendra+
6
gon yn wreic idaỽ yr hon a oed vam y walch+
7
mei. a medraỽt. Ac y rodes y vryen vab kynuarch
8
ryget dan pherthyneu. A gỽedy daruot llunyaethu
9
pop peth a dỽyn yr ynys ar y hen teilygdaỽt. A rodi
10
y paỽb y dylyet. y kymyrth y brenhin gỽreic a ha*+
11
noe o dylyedogyon rufein. A gỽenhỽyuar oed y he+
12
nỽ. Ac yn llys kadỽr iarll kernyỽ y magyssit. A
13
phryt a|thegỽch y wreic honno a orchyuygei holl
14
wraged yn|yny* prydein.
15
AC erbyn dyuodedigyath yr haf rac ỽyneb pa+
16
rattoi llyges a oruc arthur y vynet y weres+
17
cyn iwerdon. A gỽedy discyn yr tir y deuth gillamỽ+
18
ri brenhin iwerdon. Ac ynneiryf o luossogrỽyd ygyt
19
ac ef. A gỽedy dechreu ymlad sef a|wnaeth y genedyl
20
no·eth truan diaryf heb vn goir kymryt eu ffo.
21
Ac yna y delit gillamỽri ac y kymhellỽyt y darestỽg
22
y arthur. Ac o agreifft hỽnnỽ y deuth holl tywysso+
23
gyon iwerdon. A gỽrhau y arthur oc eu bod. A gỽe+
24
dy daruot gỽerescyn iwerdon mynet a|e lyghes
25
a oruc y islont. A gỽedy ymlad ar pobyl ef a|e gỽ+
26
rescynnỽys. A gỽedy clybot o|r ynyssoed ereill nat
27
oed un wlat a allei gorthỽynebu y arthur. sef dol+
28
dan vrenhin gotlont. a gỽinwas vrenhin orc. dy+
29
uot oc eu bod y ỽrhau y arthur. Ac y rodi teyrnget
30
idaỽ.
| « p 79v | p 80v » |