NLW MS. Peniarth 11 – page 33v
Ystoriau Saint Greal
33v
1
yn|gyfrinachus. a|dywedut na|s|diodevynt ỽy efo yn veistyr
2
arnadunt. ac na|s|galwynt ueỻy ef o|hynny aỻan. kanys
3
kystal oed eu|kenedyl ỽyntỽy ac ynteu. a thrannoeth y bore
4
ỽynt a|doethant y wastattir uchel. Ac yno pan vu amser
5
bwyt ef a|ossodet bort y·ryngthunt. a Josep a|aeth y eisted o|e
6
eistedua e|hun. Ac yna y|deu vroder a|dywetpỽyt uchot a|e gỽa+
7
ravunaỽd idaỽ. ac a|e gyrrassant o·honei. ac vn onadunt a
8
eistedaỽd yndi. ac yna duỽ a|dangosses gỽyrtheu tec. kanys
9
yr aỽr yr eistedaỽd. ef a|doeth y daear ac a|e ỻyngkaỽd. a|r chwe+
10
dyl hỽnnỽ a|wybuwyt ym|pob ỻe. ac y roet yn henỽ ar yr|eis+
11
tedua honno o hynny aỻan yr|eistedua beriglus. kanys ny
12
lyuassei neb eisted yndi onyt y neb y rodassei duỽ gennat|idaỽ.
13
Ac ar ol y vort honno ef a|wnaethpwyt y vort gronn yn oes
14
uthur benndragon. a hynny drwy gynghor myrdin. ac ny
15
elwit yr vn yn vort gronn namyn honno e|hun. kanys pan
16
elwit hi yn vort gronn yr ydys yn|deaỻ drỽydi y bot yn
17
gyn|grynnet a|r hoỻ vyt. o|r achaỽs y geỻir y chyffelybu hi
18
y|r byt. kanys o bop gwlat o|r y bai vilwryaeth yndi nac
19
yng|kret nac yn angkret yr|oedynt yn dyuot y|r vort gronn
20
y|lys arthur. A|phan rodei duỽ ras y vn y gaffael bot yn vn
21
o gedymdeithyon y vort gron. ef a|vydei gyn|hoffet ganthaỽ
22
a|phei enniỻei yr hoỻ vyt. ac yr bot yn|vn onadunt yr|har+
23
det uei. ef a|adawei y vam a|e|dat a|e dir a|e daear a|e wlat.
24
a|thydi a|wdost hynny kanys nyt ym·adeweist a|hi. yr a|gaf ̷+
25
fut o enryded araỻ eiryoet. A|gỽedy daruot y vyrdin. ordinav
26
y vort gronn. ef a|dywaỽt y dechreuit pererindaỽt y greal. o
| « p 33r | p 34r » |