NLW MS. Peniarth 11 – page 136r
Ystoriau Saint Greal
136r
1
yma geyr dy vronn di heno. ac a|th didanaf yny gysgych. Duỽ
2
a|diolcho ytt heb·y gỽalchmei. ac a|wnel ym aỻel y haedu neu y
3
diolỽch ytt yn|ryỽ amser. Y korr a|orwedaỽd geyr bronn gỽalchmei
4
ar warthaf kylchet. A|phan|weles ef vot gỽalchmei yn|kysgu.
5
ef a|gyfodes yn arafaf ac y gaỻaỽd ac a|doeth hyt ỻe yd oed bat
6
bychan yng|glann yr auon. ac a|aeth yndaỽ. ac a|nofyaỽd yny
7
doeth y bysgotlyn. ac yn|ymyl hỽnnỽ yr oed neuad y|myỽn ynys
8
vechan. yn|y ỻe yd oed marius yn kysgu. yr hỽnn a|dathoed yno y
9
chware. Y korr a|doeth o|r bat aỻan ac y|r neuad y kyrchaỽd. a gol+
10
leuhau a|oruc ỻoneit y dwylaỽ o ganhỽyỻeu. a|dyuot hyt geyr
11
bronn y|gỽely. a dywedut ual hynn. Ae kysgu yd ỽyt ti arglỽyd
12
heb ef. yna marius a|deffroes yn dechrynedic. ac a|ovynnaỽd ~
13
beth a|daroed idaỽ. Nyt kyn esmỽythet ytti heb y korr ac y walch+
14
mei. Ny wdost beth a|dywedy heb·y marius. Gỽnn heb y korr y
15
vot ef yn kysgu yn dy|lys di y·gyt a|th wreic. Pony daroed ymi heb
16
ynteu pei ron y dyuot ef yno erchi na lettyit. Myn vyng|cret heb
17
y korr na aỻaỽd hi wneuthur eiryoet o lewenyd y wr kymeint
18
ac a|wnaeth idaỽ ef. ac am hynny bryssya di yno kanys y mae
19
arnaf|i ovyn yd a ef a|hi ymeith kynn dy dyuot ti. Myn vyng|cret
20
heb·y marius nyt af|i yno hyt tra vo ef yno. ~
21
G walchmei a|oed yn|y neuad yn kysgu heb ymoglyt dim
22
rac hynny. A|phan|weles ef y vot yn|dyd ef a|gyfodes
23
y|uyny. a|r arglỽydes a|doeth yno. A|phryt na weles hi y|korr hi a
24
adnabu y dwyỻ. Arglỽyd heb hi ỽrth walchmei trugarhaa ỽrthyf|i.
25
kanys neu n* tỽyỻaỽd y korr. ac onyt tydi a|m nertha i ef a|oruyd
26
arnaf odef diruaỽr boen o|th achaỽs. a|chewilyd yỽ ytti hynny.
« p 135v | p 136v » |