LlGC Llsgr. 3035 (Mostyn 116) page 133v

a|e tremygassant y eu distryỽ. Ac ỽrth hẏnẏ ỽynt yn gyt+

tun a deuthant ygyt ac ef a ỻu diruaỽr y|veint gan+

tunt hyt yg kaer ỻeon y ỻe yd oed brochuael yskith+

raỽc tywysaỽc kaer ỻeon. a hyt y dinas hỽnỽ y dothoe+

dẏn o|pop gỽlat yg|kymry oỻ myneich aneiryff nifer

onadunt a|didriffwyr Ac yn vỽyaf o dinas bangor a

hynẏ y|wediaỽ dros jechyt eu pobyl ac eu kenedyl.

a gỽedy ym·gynuỻ y·gyt y deu lu o|pop parth. Dechreu

ymlad a|wnaeth y|saesson a brochuael yr hỽn a oed

lei y|nifer o varchogyon noc edelflet. Ac o|r diwed adaỽ

y dinas a|wnaeth brochuael Ac nyt heb wneuthur

diruaỽr aerua o|r gelynyon kyn y|ffo. A gỽedy kaffel

o|edelflet y dinas A gỽybot yr achaỽs yr dothoedynt

y myneich hyny yno. Ef a erchis ymchoelut yr arueu

yn|y myneich. Ac veỻy yn|y dyd hỽnỽ deukant a mil

gan eu tagu a|e ỻad. ac o goron merthyrolyaeth a gaỽs+

sant nefaỽl eisteduaeu. Ac odyna pan yttoed y|racdy+

wededic creulaỽn hỽn yn kyrchu bangor A|r brytany+

eit yn clybot y greulonder ef a|e ynuytrỽyd. Eu ty+

wyssogyon a ymgyn·uỻassant yg·kyt o|pop ỻe nyt am+

gen. Bledrus tywyssaỽc kernyỽ. Maredud brenhin

dyfet. katuan. Mab. jago brenhin gỽyned A|dechreu ymlad

a|wnaethant Ac ar hynt. kymeỻ edelfflet ar fo yn vrath+

edic gỽedy ỻad o|e lu whegỽyr a|thrugein a deg|mil Ac

ym|parth y brytanyeit y dygỽydỽys bledrus tywysaỽc

kernyỽ y|gỽr a oed penaduryaf ar yr ymlad hỽnỽ.

A c odyna yd ymgyn·uỻassant hoỻ tywyssogyon y

brytanyeit hyt yg|kaer ỻeon Ac o gyt·duundeb ỽynt

a vrdassant. katuan vab jago vab beli yn vrenhin

arnadunt. Ac erlit edelflet drỽy|humyr A gỽedy coron+

NLW MS. 3035 (Mostyn 116) – page 133v