BL Additional MS. 19,709 – page 55r
Brut y Brenhinoedd
55r
1
ac eu dỽyn hyt yno. a gvedy dechreu gossot y grỽn+
2
dywal onadunt. kymeint ac a|wnelhit y dyd o|r
3
gỽeith drannoeth pan gyfottit n·eur daruydei y|r
4
dayar y lyncu heb vybot dim y vrthaỽ mvy no
5
chẏnny ry|ffei eiroet vch y dayar. a gvedy mene+
6
gi hynny y ỽrtheyrn. gofyn a|wnaeth y dewiny+
7
on beth a|wnaei hynny. ac yna yd erchis y dewin+
8
yon idaỽ keissaỽ mab heb dat idaỽ. a|e lad a chy+
9
mysgu y|waet a|r kalch ac irav y meint a|r gỽaet
10
hỽnnỽ. a dineu y gỽaet yn|y grỽndwal hyt pan
11
safei y gveith ueỻy. ac yna yd anuonet y|pop ỻe
12
y geissaỽ y kyfryỽ uab hvnnỽ. a gỽedy dẏuot deu
13
o|r dewinẏon hyt yn dinas a elwit gỽedy hynny
14
kaer vyrdin. Nachaf y gvelynt gỽeisson ieueinc
15
yn gỽare yn drỽs porth y|dinas. a sef a|wnaeth y
16
kenadeu dynessau y edrych ar y gỽare. ac eisted
17
yn ỻudedic diffygyaỽl. ac ymwarandaỽ am y
18
neges yd oedynt yn|y cheissaỽ. a gỽedy bot y
19
gỽeisson yn gvare yn hir. daruot a|wnaeth rỽg
20
deu onadunt. a|r neiỻ onadunt a elwit myrdin
21
a|r ỻaỻ a elwit dunaỽt. ac yna y|dywaỽt dunaỽt
22
ỽrth vyrdin. py achaỽs heb ef yd amryssony ti a
23
miui nac y ymgynheny kanys dyn tyghetuen+
24
aỽl ỽyt ti heb dat idaỽ. a minheu a henỽyf o vren+
25
hinaỽl lin o bleit mam a|that. a|phan gigleu y
26
kenadeu yr ymadrodyon hynny. drychafel eu
27
hvynebeu a|wnaethant ac edrych ar vyrdin a
| « p 54v | p 55v » |