Breudwd Welsh Prose 1300-1425
Cymraeg

NLW MS. Peniarth 11 – page 189v

Ystoriau Saint Greal

189v

1
gylch eur ydiỽ ef heb·y laỽnslot. Arglỽyd heb y marchaỽc y
2
goron drein a|vu am|benn iessu grist pan|diodefawd ar|brenn
3
y groc. a|r vrenhines o|r casteỻ racko a|beris roi y goron y
4
myỽn gỽeith o eur. a|mein maỽrweirthyaỽc. ac yd ys yn|dy+
5
wedut panyỽ y marchaỽc kyntaf yr ymdangosses y greal idaỽ
6
bieivyd o anuod y vrenhines. ac am hynny ny lettyir neb o+
7
dieithyr yno. Ac yr|hynny myui a|baraf ytti esmỽythdra o|r
8
mynny dyuot y|m ỻys i. yssyd yn|y fforest yma. Duỽ a|dalo
9
ytt heb·y laỽnslot. nyt amser hỽnn y lettyu etto ~  
10
A C ar hynny drỽy gennat y|marchaỽc kerdet rac+
11
daỽ a|oruc laỽnslot. a|thrỽy edrych ar y casteỻ medyly+
12
aỽ a|oruc y dylyei y marchaỽc a|enniỻei y kylch eur o|le
13
kyn|gadarnet ac yd|oed gael clot ragoraỽl rac araỻ. Ar hynny
14
marchogaeth a|wnaeth ef. Ac ual y byd ef veỻy ef a|welei yr vn+
15
bennes a|oed yn kanlyn yr elor veirch o|e vlaen. a vnbennes heb
16
ef poet rỽyd ragot. Ac y|ttitheu antur da heb hi. Arglỽyd heb
17
hi mi a|dylyỽn gassau yn vaỽr y marchaỽc a|ladaỽd y gỽr ysyd
18
yn varỽ yman. ac yn reit y minneu y ganlynn efo ual hynn
19
y geissyaỽ y|marchaỽc a|dylyei y dial ef. ac ny welaf|i neb yn
20
damchweinyaỽ arnaỽ. A|vnbennes heb·y laỽnslot pỽy a|e ỻad+
21
aỽd ynteu. Arglỽyd heb hitheu marchaỽc urdaỽl y dreic dan+
22
ỻet. Pỽy heb ynteu a|dylyei y dial ef. Arglỽyd heb hitheu y
23
marchaỽc a ymwanaỽd a gỽalchmei yn|y ỻannerch goch yr
24
hỽnn y barnwyt idaỽ vot yn oreu o|r tỽrneimant hỽnnỽ. A
25
vu weỻ ef no gỽalchmei heb·y laỽnslot. Arglỽyd heb hi veỻy
26
y barnwyt ef am vot yn|hỽy y bara yn ymwan. Gan hynny
27
heb·y laỽnslot ys da varchaỽc yỽ ef. kan bu weỻ ef no gỽalch+
28
mei.