Cardiff MS. 3.242 (Hafod 16) – page 86
Meddyginiaethau
86
1
yn|yr un mod a bỽrỽ y pỽdyr hỽnnỽ arnaỽ. Heuyt o|r ky+
2
uyt kic dyn o|r kyfryỽ pa|le bynnac y bo y dolur a|r klỽyf
3
y losgi drỽy vỽrỽ y pỽdyr hỽnnỽ arnaỽ. a hynny yssyd
4
da. Heuyt. Kymer gic eidyon. a rostya yny vo yn bỽdyr.
5
a bỽrỽ arnaỽ. ac ef a|lad pob ryỽ gic marỽ. Heuyt
6
kymer garlỽngk gỽynn os keffy. a ỻosc ef myỽn cro+
7
chan megys y|dywetpỽyt o|r blaen a bỽrỽ y pỽdyr
8
hỽnnỽ arnaỽ. Heuyt; kymer vel a melyn·wyeu. a bla+
9
ỽt arnement. a blaỽt kyffeith. a chymysc ygyt a
10
dot arnaỽ dỽyweith rỽng y dyd a|r nos. Heuyt tar+
11
arỽm. Sef yỽ hỽnnỽ; gỽadaỽt gỽin gỽedy sycho
12
yn galet. ac|arnyment a phybyr du. a garỻec kyme+
13
int o|bob un a|e|gilyd|a|dot myỽn crochan prid a chae y
14
eneu yn|da. a gỽedy ỻosgo gỽna bỽdyr man o·honaỽ
15
a chymysc ac oleỽ o wyeu a|dot eilchỽyl ar y|tan
16
yny vo agos y galet a dot y pỽdyr hỽnnỽ arnaỽ.
17
L lyma ual|y gỽneir yr oleỽ. kymer y|riuedi
18
a vynnych o|r melyn·wyeu. a dot ỽynt y sy+
19
chu ar y tan myỽn padeỻ yny vont galet. ac yna
20
gỽna vlaỽt man ohonunt a dot eilchỽyl ar y tan
21
yny vont yn|lo a|rodi eu ffrỽyth. a dot megys y
22
todo myỽn ỻestyr y gadỽ. Heuyt; kymer benneu
23
garỻec. a ỻosc ỽynt myỽn ỻestyr prid. a|diffod a
24
mel. a dot hỽnnỽ ar|y dolur. a chymer vlaỽt ryc
25
a gỽaet hỽch. a berỽ ygyt a|mortera. a|gỽna blastyr
26
a dot ar uchaf y ỻaỻ. Heuyt. kymer wyeu a ve+
27
thont y dan iar a|chymysc a ỻin a dot ỽrthaỽ.
| « p 85 | p 87 » |