NLW MS. Peniarth 11 – page 38r

hyt hediỽ y|mae pedeir blyned a chant. a|r gỽr a|weleist di

yn|y gỽely hediỽ ydiỽ ef. ac ny weles ef etto dim o|r byt. na|e

welioed nyt ynt iach etto. a|ni a|glyỽssam uot y marchaỽc

hỽnnỽ yn|y wlat honn. ac ueỻy y daruu y vrenhin mora+

drins. y·gyt a|hynny y mae yn|gann mlyned yr pan aeth yn|y

benn ef neb ryỽ vỽyt daearaỽl. namyn corff y arglwyd ual y

gweleist di hediỽ yr offeiryat ar ol yr offeren yn|y roi idaỽ. ac

veỻy y mae ef yr pan vu Josep hyt yr aỽr·honn. yn|gyffelyb

ac y|daruu y seint simeon wirion gynt yr hỽnn a|wnaeth y

wedi na bei varỽ vyth yny welei iessu grist. ac ynteu a|gafas

gan duỽ atteb na bydei. ac ueỻy yd|arhoes simeon hevyt. yny

doethpỽyt a|e|brynyaỽdyr attaỽ y|r demyl. ac ynteu a|e kymerth

y·rỽng y dwylaỽ yn ỻawen orawenus. ac ueỻy y tebygỽn

ninneu vot y gỽr hỽnn yn kaffael y wedi. ac yn aros dyuody+

at galaath varchaỽc. a|ỻyna vi gỽedy dywedut ytti y wirio+

ned am a ovynneist. dywet titheu y minheu pa vn ỽyt ti.

Ac yna ynteu a|dywaỽt mae o|lys arthur yd hanoed a|phere+

dur gymro y|m gelwir. A|phan|gigleu y gỽr hynny ef a vu

lawen kanys ef a|glywssei yn vynych ymdidan amdanaỽ.

ac a|adolygaỽd idaỽ yr duỽ drigyaỽ y·gyt ac ỽynt y dyd hỽn+

nỽ. ac ynteu a|dywaỽt na chaffei ef drigyaỽ rac meint oed

idaỽ o|e|wneuthur. ac ar hynny kymryt y gennat a my  ̷+

net ymeith. a marchogaeth racdaỽ yny vu hanner dyd.

Ac yna ef a|e duc y fford ef drỽy y glynn teckaf o|r byt.

ac yno ef a|gyfaruu ac ef ugein wyr yn|aruaỽc. a gỽr ne+

wyd|lad y|myỽn|elor ganthunt. ac ỽynt a|ovynnassant y