NLW MS. Peniarth 11 – page 11v
Ystoriau Saint Greal
11v
1
y|uot ef yno. Ac ygyt y kysgassant eỻ|tri y nos honno. A
2
thrannoeth wynt a|wisgassant eu harueu ymdanunt.
3
ac a|aethant y warandaỽ offeren. A|gỽedy offeren ef a|o ̷+
4
vynnaỽd brenhin bandymagus y vn o|r|brodyr pa|le yd ̷
5
oed y|daryan yr|oed y|son am danai*. Y ba ryỽ beth heb y
6
braỽt. vym|bryt heb ynteu yssyd ar y dỽyn y·gyt a|mi
7
y edrych ae gỽir a|dywedir am·danei. Ny chynghorỽn i
8
heb y braỽt ytti y dỽyn hi yr dim. kanys ny thebygỽn
9
dyuot itt o|e|dỽyn amgen no som a chewilyd. Yr|hynny
10
heb y brenhin mi a vynnỽn gaffael y gỽelet hi y edrych
11
pa|weith yssyd arnei. Ac yna y braỽt a|e|duc hi hyt rac
12
bronn yr aỻaỽr uaỽr o|e dangos idaỽ. ac ynteu a|dywaỽt
13
eiryoet na welsei yr vn degach no hi. na maỽrweirthogach.
14
A|phan|welas owein y|daryan. ef a|dywaỽt ỽrth y brenhin.
15
Myn|duỽ heb ef mi a|gynghorỽn y neb na bei gyn ehofnet
16
a|dỽyn y daryan honn onyt a|wypei y vot yn gennat idaỽ
17
y dỽyn. ac myn vy|ngret heb ef nyt a hi vyth am vy my ̷+
18
nỽgyl i. kanys mi a|ỽnn arnaf nat wyf kyn deilynghet
19
ac y|dylywyf y|dỽyn. Myn duỽ heb y brenhin bandymagus
20
beth bynnac a|darffo ymi. mi a|e dygaf hi odyma. ac yna
21
y chymryt a|oruc ef a|e roi am y vynỽgyl. a|e dỽyn o|r eglỽys
22
ac esgynnu ar y uarch. ac yna dywedut ỽrth galaath. Ar+
23
glỽyd heb ef pei ranghei vod yti. Mi a|adolygỽn itt nat elut
24
odyma yny|wyput beth a|darffei im am y|daryan honn. ka ̷+
25
nys o|darffei im namyn|da. mi a|vynnỽn y|ỽybot ohonat ti.
26
kanys tydi a|orffenny yr antur hỽnn. Mi a arhoaf yn|ỻaỽen
| « p 11r | p 12r » |