LlGC Llsgr. 3035 (Mostyn 116) page 29v

plith gỽyr goroec ef a|dybygei na cheynt dragywydaỽl

hedỽch yn eu plith o|r dyd hỽnnỽ aỻan. Kanys ỽyron

a|gorỽyron y|rei ỻadedigẏon a goffent eu gelynyaeth

ac ỽynt yn dragywydaỽl ac eu hetiued ỽynteu.

Ac o|r darffei bot brỽydyr yrygtunt niuer goroec

beunẏd a amlaei a|niuer tro a|leihaei. Ac ỽrth hyny

y kyghorei kymryt y verch hynaf y|pandrassus yr

hon a|elwit ygnogen yn wreic y eu tywyssaỽc. A

ỻogeu a|phob peth o|r a vei reit vdunt ỽrth eu hynt

Ac os hynẏ a geffit kymryt kanhat y vynet y|le

y geỻynt kaffel tragywydaỽl hedỽch. ~ ~ ~

A gỽedẏ daruot y vembyr teruynu yr ymadraỽd

hỽnnỽ vuydhau a|wnaeth yr hoỻ gynuỻeitua y|ỽ

gyghor. A dỽyn pandrassus y ganaỽl y|gynuỻeit+

ua A|wnaethpỽẏt a dywedut idaỽ idi heuyt yn|di+

annot ony|wnelei yr hyn yd oedynt yn|y a·dolỽyn. A

thra|yttoedit yn dywedut ỽrthaỽ yr ymadraỽd hẏnẏ

y|dodet ynteu y|myỽn kadeir oruchel mal y|dylyei

vrenhin. A|gỽedẏ gỽelet ohonaỽ gogyuadaỽ y agheu

atteb a|wnaeth yn|y wed hon. Kanys y|tyghetueneu a|n

rodes ni yn aỽch medyant chỽi dir yỽ ymi wneuthur

aỽch mynu chỽi rac coỻi an buched yr hon nyt oes

a vo gỽerthuorach na digrifach no hi yn|y byt her+

wyd y gỽelir ymi Ac ỽrth hẏny nyt ry·ued y|prynu

o|pop ford Ac y gaỻer y|gaffel. a|chyt boet gỽrthỽy+

neb genyf. i. rodi uy merch eissoes didan yỽ genyf

rodi y|r gỽas jeuanc clotuaỽr hỽnỽ. A|heinỽ o|etiued

priaf vrenhin tro ac anchises a|r boned yssyd yndaỽ

ynteu yn blodeuaỽ mal y geỻir y|welet yn eglur

A|phỽẏ a aỻei eỻỽg. kenedyl tro hediỽ yn ryd yr

NLW MS. 3035 (Mostyn 116) – page 29v