LlGC Llsgr. Llanstephan 27 (Llyfr Coch Talgarth) page 85v

ac y|r adar. ac eu ỻewenyd yỽ eu plant. Myui vy|hun hagen

a|dieithreist di o|r rod honno. a|thitheu a adnabuost o dechreu

vym priodas. pei rodut ym blant ae mab ae merch mi a|e

rodỽn y|th wassanaeth di. a thra yttoed hi yn dywedut hyn+

ny nachaf angel yn ymdangos idi. ac yn dywedut. anna

nac ovynhaa kanys yng|kyngor duỽ y mae dy blant ti. ac a

aner o·honat ti a vyd ryuedaỽt y|r hoỻ o·essoed hyt eu

diwed. a gỽedy dywedut o|r angel hynny. kiliaỽ a|oruc y

ỽrthi. a phan dywaỽt yr|angel yr ymadraỽd hỽnnỽ ỽrthi

ergryn a wnaeth. ac yna mynet a|oruc hi y chudugyl. a

mynet y gỽely. ac yno y bu megys marỽ ar|hyt y nos. a thr+

annoeth yn|y gỽedi y trigyaỽd. a|gỽedy hynny hi a alwaỽd

y morỽyn attei. ac a|dywaỽt ỽrthi. a|wely|di vyng|gỽeddaỽt

i a|m govit. ac ny vynneist dyuot attaf yr hynny. Ac yna

y hattebaỽd y vorỽyn hi dan drablud a|dywedut ual hyn. ae

o chaeaỽd duỽ dy groth di. ac o duc duỽ dy wr y gennyt. beth

a wnaf|i ỽrth hynny. Ac yna pan gigleu anna y uorỽyn yn

dywedut hynny hi a|wylaỽd yr eilweith. Ac yn|yr amser

hỽnnỽ yd ymdangosses gỽas ieuangk y ioachim. yn|y ỻe

yd oed yn|y mynyd y·gyt a|e ysgrybyl. ac y dywaỽt ỽrthaỽ. Pa+

ham heb ef nat ym·choely di att dy wreic atref. Joachim

a|dywaỽt ỽrthaỽ. yr ys ugein mlyned yd ym ygyt. ac am

nat oed ymi blant mi a gilyeis o|r|demyl yn waradỽydus.

beth a ymchoelaf inneu attei hi beỻach pan ym bỽryer

unweith y ỽrthi. yma y trigyaf|i ygyt a|m deueit tra

vynno duỽ vy myỽ. trỽy dỽylaỽ vy meib·yon i y rodaf|in+

neu y anghenogyon a|gỽraged gỽedwon. a meibyon ymdi+

NLW MS. Llanstephan 27 (The Red Book of Talgarth) – page 85v