Cardiff MS. 1.363 (Hafod 2) – page 176r
Brut y Brenhinoedd
176r
1
tywyssaỽc bỽrell o cenoman en|y kyỽarỽot
2
ac evander bre+
3
nyn syrya en vrathedyc gan Gwayv hvnnỽ|e
4
dygwydỽs. kollassant hevyt y gyt ac ef pedw+
5
ar gwyr bonhedyc. hyrglas o peyrỽn. meỽryc
6
o kaer keynt. ac alydỽc o tyndagol. a hyr vap
7
hydeyr. no|r rey henny nyt oed havd kaffael nep
8
Glewach noc wynt. Ac yr henny ny pheydas+
9
sant e brytanyeyt oc eỽ glewder. namyn oc
10
eỽ holl lafvr kadv eỽ karcharoryon a chyw+
11
arssangỽ eỽ gelynyon. Ac o|r dywed ny allas+
12
sant er rỽueynwyr dyodef eỽ rvthyr namyn
13
en kyflym adaỽ e maes a ffo parth ac eỽ pebyl+
14
leỽ. Ac eyssyoes e brytanyeyt kan eỽ herlyt en
15
gwneỽthỽr aerỽa onadvnt ny pheydassan en
16
daly llawer onadvnt|hyt pan ladassant. Wltey. ca+
17
ttell senedỽr. ac evander brenyn syrya. Ac|gw+
18
edy kaffael o|r brytanyeyt o wudvgolyaeth wy+
19
nt a anỽonassant e karcharoryon hyt em parys.
20
Ac wynte ar rey a deylyessynt o newyd a ymchw+
21
ellassant at arthỽr eỽ brenyn kan adaỽ gobeyth
22
holl wudvgolyaeth ydaỽ. kanys bychan ed oedynt
23
wy ar ry kewssynt wudỽgolyaeth o|r saỽl elynyon henny.
| « p 175v | p 176v » |