NLW MS. Peniarth 11 – page 134r
Ystoriau Saint Greal
134r
1
waeỽ yny yttoed yn|weyll. Ac yna tynnu cledyf a|oruc gỽalch+
2
mei. ac arglỽyd y corsyd a dynnaỽd araỻ. ac a|wahardaỽd y dylỽ+
3
yth nat ymyrrynt y·ryngthunt. kanys ny chaỽssoedyat eiry+
4
oet uarchaỽc a|e bỽryei hyt y dyd hỽnnỽ. Yna ym·newidyaỽ dyr+
5
nodeu a|orugant ar eu helmeu yny yttoed eu ỻygeit yn disse+
6
rennv. a|r tan yn neidyaỽ o|r cledyfeu. A thrymach oed dyr+
7
nodeu gỽalchmei ym peỻ no dyrnodeu y ỻaỻ. kanys kyn ffestet
8
yr|oed yn|taraỽ. ac yd|oed y gỽaet yn|ffrydyeu yn dyuot o|e drw+
9
yn ac o|e eneu y arglỽyd y corsyd. ac yny oed y luryc yn ỻaỽn
10
gỽaet. ac e|hun yn adef ac yn|dywedut na aỻei ef odef y vatteil
11
mwy. ac ymroi yn garcharaỽr. Ac yna arglỽyd y corsyd a|aeth
12
o|e bebyỻ. a gỽalchmei y·gyt ac ef. yna disgynnv a|wnaethant.
13
nam gỽalchmei ny adaỽd heb gof gymryt y march. ac erchi y
14
vn o|r pump marchaỽc gadỽ y march hỽnnỽ idaỽ. Ac ar hynny
15
nachaf kỽbỽl o|r a|dathoed yno o varchogyon urdolyon yn dyuot
16
ac yn|dywedut panyỽ y marchaỽc a|r|daryan goch a|r eryr eur yn+
17
di a|vuassei oreu. ac yna govyn a|orugant y arglỽyd y corsyd a|yt+
18
toed ef yn kyttuunaỽ a|hynny. Yttwyf heb ynteu. Tydi arglỽyd
19
heb ỽynteu ỽrth walchmei bieu kadỽ casteỻ y wreic wedỽ o gam+
20
alot hyt ym|penn y vlỽydyn. Duỽ a|diolcho yỽch heb·y gỽalchmei.
21
Ac yna galỽ y pump marchaỽc a|oruc gỽalchmei a|dywedut. Arglỽ+
22
ydi heb ef yd ỽyf|inneu yn|gadaỽ y pump yman o|e warchadỽ ef yn
23
vy henỽ inheu. ac yna kytuunaỽ a|wnaethant ar hynny. arglỽyd
24
heb·y gỽalchmei ỽrth arglỽyd y corsyd a|minneu a|th rodaf dithev
25
megys carcharaỽr y|r wreic wedỽ yr|honn a|m|ỻettyaỽd inneu nei+
26
thỽyr. Arglỽyd heb ynteu ny wney di hynny. kanys nyt vn ffu+
27
nyt
| « p 133v | p 134v » |