Cardiff MS. 1.362 (Hafod 1) – page 44v
Brut y Brenhinoedd
44v
1
teit ar a|uuassei ỽr idaỽ kyn no hynny. A galỽ
2
y brenhin attaỽ megys y gyfrỽch yn|y lle ys+
3
kyualaf; A gỽedy gyrru paỽb y ỽrthtunt y
4
lladaỽd y tỽyllỽr y brenhin a chyllell.
5
AC yna gỽedy llad custenhin vendigeit
6
y kyuodes anuundab y·rỽg gỽyrda y teyr+
7
nas am wneuthur brenhin; kanys rei a vynnei
8
wneuthur emrys wledic yn vrenhin; ereill a uyn+
9
hei uthur pen dragon. Ereill a vynhynt wneuthur
10
vn o|e kenedyl e hun; Ac o|r diwed gỽedy na du+
11
unynt am hynny; Sef a|wnaeth gỽrtheyrn gỽr+
12
theneu; Jarll a oed hỽnnỽ ar went ac ergig ac uas.
13
ỽrth geissyaỽ e|hun y vrenhineaeth o|r diwed;
14
mynet hyt yg kaer wynt y lle yd|oed constans
15
yn vanych; A dywedut ỽrthaỽ ual hyn; Cons+
16
tans heb ty tat ti ar y uu varỽ; at vrodyr ys+
17
syd jeueinc ydy wneuthur vn o·nadunt yn vren+
18
hin; Ac ỽrth hynny o bydy ti ỽrth vy kyghor i
19
ac ychwanaccau vy medyant i; mi a para ty
20
tynnu o|r abit hon a|th wneuthur yn vrenhin
21
kyt bo gorthỽyneb gan yr urdas; A phan gig+
22
leu constans yr amadrodyon hynny llewenha+
23
u a oruc. Ac adaỽ trỽy aruoll rodi pop peth idaỽ
24
o|r a uynhei. Ac yn diannot y tynnu a wnaeth
25
gỽrtheyrn o|r vanechtit. Ac o vreid kaffel can+
26
hat y dyrchauel yn vrenhin. Ac yn yr amser
27
hỽnnỽ marỽ uuassei kuhelyn archescob. Ac ỽrth
28
hynny ny chaffat vn escob a|e kyssegrei yn vren+
29
hin ỽrth y tynnu o|r creuyd. Ac eissoes nyt e+
| « p 44r | p 45r » |