BL Additional MS. 19,709 – page 11r
Brut y Brenhinoedd
11r
1
ỻe y dywedassaei ry adaỽ y get˄ymdeith. a gỽedy eu
2
dyuot hyt yno kyuodi a|wnaeth brutus a|e vydin
3
gantaỽ yn aruavc parth a|r ỻu. ac eu ỻad yn ỻỽyr
4
ac odyna kerdet a|oruc parth ac ar y ỻu a rannu
5
y lu yn teir bydin a gor˄chymyn y baỽb kerdet yn da+
6
wel. a chyrchu o|pop parth y|r ỻu heb frost gan neb
7
ac na la·dei neb o·nadunt vn gỽr yny elei vrutus hyt
8
ym|phebyỻeu y brenhin yn gyntaf. ac yna pan glyỽ+
9
ynt y gorn ef gvnelei bavb y aỻu ~ ~ ~ ~ ~ ~ ~ ~
10
A gỽedy eu dysgu y·veỻy o vrutus vynt. kerdet
11
a|wnaethant yn dawel ac yn reolus yny doeth+
12
ant ym|plith y|ỻuesteu paỽb yn|y gyfeir. ac y·ueỻy
13
aros yr arvyd teruynedic a oed y·rygtunt ac eu
14
harglỽyd. Ac yna gvedy dyuot brutus y drỽs pebyỻ
15
y brenhin y|r ỻe y damunassei y dyuot idaỽ heb an+
16
not y kanpỽyt y corn yn arvyd. ac yna ny|s annodes
17
neb o|e wyr. namyn mynet y|myvn ar dorr y kysga+
18
duryeit a rodi dyrnodeu agheuavl udunt. ac yn|y
19
wed hono crỽydraỽ y pebyỻeu a|r ỻuesteu. ac y·veỻy
20
gan gỽynuan a disgyryeu y rei meirỽ y dyffroei y rei
21
byỽ. a megys deueit ym|plith bleideu heb ỽybot ford
22
y|fo yd arhoynt eu hageu. Nyt oed udunt naỽd
23
kanẏ cheffynt o ennyt gỽisgaỽ eu harueu ny che+
24
ynt ỽynteu ffo namyn ry·dec yn noeth diarfot ym+
25
plith eu gelynyon aruaỽc ac veỻy y|ỻedit. ac o|di+
26
aghei neb ac ychydic o|e eneit gantaỽ rac meint
27
y awyd yn fo briwav ac yssigaỽ a|wnaei ar gerryc
28
a drein a|mỽyeri. ac y·gyt veỻy y|coỻynt eu gỽaet
| « p 10v | p 11v » |