Breudwd Welsh Prose 1300-1425
Cymraeg

NLW MS. Peniarth 32 (Y Llyfr Teg) – page 192

Llyfr Iorwerth

192

aỻan. o achaỽs mynet gỽydwaled y·rygthunt
ac eu|dylyet. a|e bot yn haỽl dra|blỽydyn.
Pỽy bynnac o aỻtut gỽedy ranno a|e arglỽ+
yd a drickyo heb ganhat hỽy no their·nos
a thri·dieu. heb y vynet y|r ỻe y dylyo; coỻet
kỽbyl o|r|eidaỽ. O|deruyd. y dyn porthi dyn deho+
ledic a|deholer o vraỽt y kyfreith. neu dyn a vo bỽ+
yt·wahard o ganhat arglỽyd; Rei a|dyweit
dylyu o·honaỽ bot dan y|weithret. kyfreith. eisso+
es a dyweit na|dylyir namyn kamlỽrỽ y|r
arglỽyd. O|deruyd. y dyn damdỽng da diwahan
yn ỻaỽ dyn araỻ. a|chaffel dryỻ o·honaỽ ỽrth
y damdỽng; kyfreith. a|dyweit dylyu o·honaỽ gaffel
kỽbyl. Sef yỽ da di·wahan. aniueil; a gaỻu
y damdỽng ỽrth y groen. O|deruyd. y dyn holi da
gỽahanedic; aryant. a diỻat. ac yscrybyl. kyt
coỻei ef y tri|pheth hynny ygyt. neu ynteu
bop un|onadunt ar wahan; ny barn kyfreith. idaỽ
kaffel namyn a vo ỽrth y damdỽng. O|deruyd.
y dyn damdỽng ỻedrat yn ỻaỽ araỻ. a|dodi
o·honaỽ arwaessaf. ac na|s kymero y ganthaỽ.
ac eissoes yr y dyuot y ganthaỽ ae o rod ae
venffyc. ae o|gyfneiwit* a mach arnei. ac na| ̷
kymero ef rac coỻi y da; kyfreith. a dyweit y dyly
y broui ar yr arwaessaf ry dyuot y da y gan+
thaỽ. ae trỽy vach ae trỽy dyston. Sef achaỽs
yỽ.