Breudwd Welsh Prose 1300-1425
Cymraeg

NLW MS. Peniarth 32 (Y Llyfr Teg) – page 166

Llyfr Iorwerth

166

Pỽy bynnac y rodher oet idaỽ; neut eidaỽ yr
oet. gỽnaet ynteu a vynno. ae arhos yr oet.
ae talu kyn yr oet. Py aniueil bynnac a lad+
ho dyn bonhedic. a cheissaỽ o|r genedyl dodi
galanas amdanaỽ; ny|s dylyant kyt adefher.
Sef achaỽs yỽ; ỽrth na eiỻ vn dyn talu gala+
nas. ac na dyly kenedyl talu gỽeithret aniueil
eu kar. a hỽnnỽ yỽ yr vn ỻe y telir y ỻofrud
yn ỻe y weithret. Pỽy bynnac a|dylyho da y
araỻ; ny dyly kymryt da aghyuodedic nac
yn tal nac yg|gỽystyl. o·nyt na bo da amgen
ar helỽ y kynnogyn. Sef yỽ da agkyuodedic;
da ny aỻo y neb y talher idaỽ y gychwyn ford
y mynno. O deruyd. y|dyn yn hely goỻỽng ar ani+
ueil. py ryỽ aniueil bynnac vo. a chyfaruot
kỽn segur ac ef a|e lad. y kỽn a|e kyuodes biei+
uyd. o·nyt kỽn y brenhin vyd y kỽn segur.
a ỻyna hyt y dyly yr helyỽr kyntaf bot yr
aniueil yn|y vreint. a|e ardelỽ; yny ymchoelo
y wyneb y tu ac adref. a|e gefyn ar y hely. a|chyt
bo y gỽn yn hely o hynny aỻan. kyt as|ỻadont;
ny cheiff ef yr aniueil. namyn y kỽn segur.
O|deruyd. y ffordaỽl y|ar y ford welet aniueil a|e vỽrỽ
ae a maen ae a|pheth araỻ. a|vedru. Ryd yỽ
idaỽ y erlit gỽedy hynny yny godiwedho. ac
nyt ryd idaỽ y saethu ony|s medyr y|ar y|fford.