Breudwd Welsh Prose 1300-1425
Cymraeg

NLW MS. Peniarth 31 – page 11v

Llyfr Blegywryd

11v

o|r crỽyn. ỽrth reit y brenhin yd helyant hyt galan
gayaf. o hynny. hyt ym pen y naỽ·uet·dyd o|r vn
mis hỽnnỽ; ny helyant y neb namyn udunt e|hu+
nein heb gyfrannu dim a neb. Ef a geiff y tir yn
ryd. A|e varch yn wastat y gan y brenhin a dỽy
ran idaỽ o|r ebran. Yr haf y keiff croyn buch. Ac o+
ny chyffry ef y distein am y crỽyn yn yr amseroed
hynny; ny|s keiff guedy hynny. Ef a geiff pedeir ke+
inaỽc kyfreith y gan pop kynyd milgi. Ac ỽyth
geinhaỽc kyfreith y gan pop vn o gynydyon y gell+
gỽn. pan elhont yn eu sỽydeu. Pan el y brenhin
y anreithaỽ; kanet y pen kynyd y gorn pan vo am+
ser idaỽ. a dewisset y llỽdyn a uynho o|r anreith.
Ac o trayan y brenhin o|r crỽyn y penkynyd a ge+
iff y trayan. Ac ef yỽ vn o|r dynyon y trayana y
brenhin idaỽ. Ny chymhellir y pen·kynyd y ỽrth+
eb y neb o vn dadyl eithyr y vn o|r sỽydocyon llys.
Ef a geiff y gan gynydyon y gellgỽn ran deu ỽr
o|r crỽyn. A ran gỽr y gan gynydyon y milgỽn.
Pop kynyd gellgỽn; a geiff ran deu ỽr o gynydy+
on y milgỽn. Kylch ar vilaeneit y brenhin a ge+
iff y pen kynyd ar kynydyon guedy ranhont y
crỽyn. Ar nadolyc y deuant y gyt y gymryt eu bre+
int ac eu dylyet y gan y brenhin o kyfreith. Y le