Breudwd Welsh Prose 1300-1425
Cymraeg

NLW MS. Peniarth 11 – page 97v

Ystoriau Saint Greal

97v

regys y|r cledyf yr hỽnn a|elwir y cledyf a|r odidaỽc wregys. yr
hỽnn y mae galaath uab laỽnsot yn|y arwein yr aỽr·honn. y·gyt
a|hynny yd oed yn|y ỻythyr dywedut ual y buchedockaaỽd hi. ac ual
y buassei uarỽ. A|pha|delỽ y|daroed y galaath a|pheredur a|bỽrt y
hamdoi. a|e dodi yn|yr ysgraff yno. a|phan|wybu ef wirioned am
bop peth hyfrydach uv ganthaỽ. kanys clywssei uot galaath a
pheredur a|bỽrt y·gyt. Ac yna ef a|roes y|ỻythyr drachevyn. Ac a
a*|wediaỽd y arglỽyd ar|gaffael ohonaỽ gỽelet y vab kynn gorffen y
bererindaỽt. ac ual yr|oed laỽnslot yn gỽediaỽ ueỻy ef a|welei yr ysgraff
yr|honn a|vuassei yn|hỽylaỽ yn hyt y nos yn kymryt tir y myỽn cre+
ic uaỽr. Ac yn|y ỻe hỽnnỽ ef a|welei gapel. ac yn|y ymyl gỽr prud yn
eisted. ac yr|aỽr y gỽeles y gỽr ef a|r ysgraff yn tiriaỽ. ef a|doeth attunt
ac a|gyfarchaỽd gỽeỻ y laỽnslot. ac a|ovynnaỽd idaỽ beth a|e|dugassei
yno. A|laỽnslot a|datkanaỽd idaỽ y antur oỻ o gỽbyl. a|pha|delỽ y
dugassei y dynghetuen ef yno. Yna y govynnaỽd y meudỽy idaỽ
pa vn oed. A|phan wybu ef panyỽ laỽnslot ef a|vu ryued ganthaỽ.
ac a|ovynnaỽd idaỽ pỽy oed gyt ac ef yno. arglỽyd heb ynteu a doi
di y edrych. ac yna y doeth y myỽn ac y gỽeles y uorwyn yno. a
chymryt y ỻythyr a|oruc a|e darỻein. a|phan|weles ef yn|y ỻythyr
gyrbỽyỻ y cledyf a|r|odidaỽc wregys. Ha|laỽnslot heb ef ny the+
bygassỽn i gaffael o·honaf o hoedyl kyhyt ac y kaffỽn wybot he+
nỽ y cledyf hỽnnỽ. ac am hynny laỽnslot heb ef tydi a|eỻy dywe+
dut dy uot ti yn|direidỽr pryt na chefeist vot ỽrth orffen yr antur
hỽnnỽ ual y bu y gỽyr ereiỻ. y rei a|dybygessit eu|bot yn waeth
gỽyr no thydi. yr hynny ual|kynt heb ef pany bei garu o|duỽ dy+
di ny adei ef y ti dyuot yng|kedymdeithyas morỽyn kystal a|honn.