Breudwd Welsh Prose 1300-1425
Cymraeg

NLW MS. Peniarth 11 – page 127v

Ystoriau Saint Greal

127v

y gỽalchmei a|gaffaf|i dy gennyat ti beỻach. Key heb hi yn
ỻawen. a duỽ a|vo gỽercheitwat arnat. ac a|dalo ytt dy gedym+
deithyas da. A unbennes heb ynteu vyng|gỽassanaeth i a|vyd
paraỽt ytti yn|wastat. Duỽ a|dalo ytt heb hi. Ac weldy racko dy
fford di y vynet heb y groes racko. a|phan|darffo ytti adaỽ y ffo+
rest honn. ti a|deuy y fforest araỻ deckaf o|r a|weleist eiryoet. Ar
hynny gỽalchmei a|aeth racdaỽ o|e fford. pan gigleu yr vnbennes
a|oed ar y thraet yn dywedut. ac yn galỽ arnaỽ. Gỽalchmei gỽ+
alchmei heb hi. nyt ỽyt mor bỽyỻus di ac y tebygassỽn i. ac yna
troi penn y varch yn|dechrynedic a|oruc gỽalchmei. a|govyn idi
paham. am na ovynneist y|m arglỽydes i paham y|mae yn dỽyn
y breich ar y hysgỽyd. kymeint vyd dy vedylyeu di. pan|delych
y lys brenhin peleur a hynny. a gedymdeithes heb hi na ogana
di walchmei e|hun mỽy no hoỻ deulu arthur. kanys nys govyn+
naỽd neb o·nadunt. Yna yr vnbennes a|erchis y walchmei kerdet
dra|e|gevyn. ac a|dywaỽt mae ouer oed idaỽ y ovyn beỻach. ac
ny|s|gỽybydy paham. yny gỽypych y gan y marchaỽc urdaỽl
a|elwir cwart cỽardyn yn ffrangec. y marchaỽc cachyat y ge+
lwir ynteu y|nghymraec. a|hỽnnỽ yssyd varchaỽc urdaỽl ymi
ac yssyd y|m keissyaỽ. a|vnbennes heb·y gỽalchmei nys|govyn+
naf|inneu mỽy ytti. Ac|yna kychwyn racdaỽ a|oruc ef. Yma
y|mae yr ymdidan yn tewi am vorynyon y gadeir. ac yn traeth+
thu am·dan walchmei. ~ ~ ~  
E ma* y|mae y kyvarwydyt yn|dywedut adaỽ o walchmei
y fforest hagyr. a|dyuot y|r dec. yr|honn a|oed laỽn o bop
da ac aniueilyeit tec. a marchogaeth a|oruc yn vedylgar. ac