Breudwd Welsh Prose 1300-1425
Cymraeg

NLW MS. 3036 (Mostyn 117) – page 69

Brut y Brenhinoedd

69

on rac hỽnnỽ. Ac eissoes yn gỽrthỽynebu idaỽ yn ỽraỽl.
Ac yn paraỽt y diodef agheu tros eu gwlat a|throstunt
e|hunein. Ac ym pen yr eildyd guedy guarchae kas  ̷+
wallaỽn y velly. Ac nat oed nat* bỽyt na diaỽt. ofyn+
hau a wnaeth kaswallaỽn rac newyn bot yn dir idaỽ
ymrodi yg|karchar ulkessar. Sef a oruc anuon ar a+
uarỽy y erchi idaỽ y tagneuedu ac ulkessar. rac y|
genedyl golli teilygdaỽt y|teyrnas guedy darffei
dala kaswallaỽn. A menegi idaỽ kyt ryuelhei ef ar
talym ar auarỽy yr y darestỽg a|e gospi; na mynnei ef
eissoes y agheu ef yr hynny. A guedy menegi hynny
y auarỽy. yna y dywaỽt ynteu nat oed haỽd karu
tywyssaỽc a uyd guar ar y ryuel megys oen. Ac a uyd
creulaỽn a dywal megys lleỽ ar yr hedỽch. Oi a dỽyeu
nef a dayar yr aỽr hon y|mae ef y|m guediaỽ i. y|gỽr a
oed arglỽyd arnaf inheu gynheu. Yr aỽr hon y|mae
ef yn damunaỽ y tagneuedu trỽy darystygediga+
eth y vlkessar. y|gỽr a oed da gan vlkessar kyn no hyn;
kaffel tagneued y|gantaỽ ef. Ac ỽrth hynny ef a dy+
lyei uedylyaỽ ac edrych yn iaỽn ỽrth y|gỽr hỽnnỽ trỽy
yr hỽn y|gallỽys ef dỽy weith gỽrth·lad amheraỽdyr
rufein o|e teyrnas. A|e dỽyn idi y tryded weith o|e an+
uod. Ac ỽrth hynny nyt oed iaỽn dadleu a|miui yn
gam nac yn enwir. kanys gelleis i gỽneuthur y
guassanaetheu hynny yna. Ac ar aỽr hon y|gỽne+
uthum hỽnn. Ac ỽrth hynny anoethinab ac aghy+
mendaỽt yỽ guneuthur sarhaedeu ac ym·geinuaeu