NLW MS. 3035 (Mostyn 116) – page 98v
Brut y Brenhinoedd
98v
o|r saesson. ỽynt a erlityassant y brytanyeit hyt y|mynyd da+
men gan eu ỻad hyt tra gynhelis yr heul y|dẏd. Ac yseff
oed ansaỽd y|mynyd hỽnnỽ. vchel oed. a|cheỻi yn|y pen A|cher+
ryc yn|y chylch diffỽys y|meint. A|ỻe adas y bressỽylaỽ bỽys+
tuileit. A|r mynyd hỽnỽ a gymerassant y brytanyeit a|e
gynal yn amdiffyn vdunt y|nos. A gỽedy goruot o|r nos
ar y dyd. vthur bendragon a dyfynỽys attaỽ y|tywyssogy+
on. a|r jeirỻ a|r barỽnyeit hyt pan vei drỽy eu kygor ỽynt
py|wed y|gỽrthỽynepynt y eu gelynyon. Ac yn gyflym ỽynt
a deuthant ỽrth dyfyn y brenhin. Ac gỽedy eu dyuot ygyt
yd erchis y|brenhin vdunt rodi eu kygor Ac yn gyntaf yd
erchis y ỽrlois tywyssaỽc kernyỽ dywedut y|gygor eff.
kanys gỽr doeth aeduet y|synwyr oed hỽnỽ Ac ar hynny
gỽrlois a dywaỽt val hyn. Nyt reit heb ef amgylchon nac
amadrodyon gorwac yglylch* hyn. Namyn hyt tra barhao
y|nos y|mae jaỽn inni ar·ueru o leỽder a deỽred o mynỽn
ninheu arueru o rydit a vo hỽy ac o|n buched. kanys maỽr
yỽ amylder y|paganyeit a|e chỽant y ymlad. A|ỻei yỽ an
nifer ninheu Ac os y|dyd a arhoỽn ny barnaf i bot yn|gry+
no inni ymgyfaruot ac ỽynt. Ac ỽrth hyny hyt tra barhao
tywyỻỽch y|nos diskynỽn ac yn deissyfeit kyrchỽn am eu
pen yn eu pebyỻeu yn diarỽybot. kanys ny thybygant
ỽy an dyuot ni Ac veỻy yn dirybud diaruot y kaffỽn ni
y vudugolyaeth onadunt os o vn vryt yd aruerỽn ninheu
o|leỽder a hynẏ heb petrus. A|r kygor hỽnnỽ a vu da gan baỽb
Ac vfydhau a|wnaethant o|e dysc ef Ac yn dianot kywei+
raỽ eu bydinoed Ac yn wis·gedic oc eu harueu. kyrchu
lluesteu eu gelynẏon. Ac yn dihewyt ac o vn vryt eu
kyrchu. A gỽedy eu dyfot yn gyfagos y|r ỻuesteu. y|gỽyl+
wyr a ỽybuant eu bot yn dyuot. Ac o|sein eu kyrn y
| « p 98r | p 99r » |