Breudwd Welsh Prose 1300-1425
Cymraeg

NLW MS. 3035 (Mostyn 116) – page 27v

Brut y Brenhinoedd

27v

o|vỽrỽ brỽnstan todedic am eu pen. Ac y·veỻy yd ymdif+
ferynt yn ỽraỽl Ac yna gỽedy gossot o|wyr goroec hỽch
ỽrth y ty a|dechreu y|gladu y|adanaỽ sef a|wnaethant
ỽynteu bỽrỽ dỽfỽr brỽt a|than gỽyỻt o|r ty am eu pen.
Ac y·veỻy eu kymeỻ y|ffo y|ỽrth y|tẏ ac eissoes o|r diwed
o eisseu bỽyt. a|pheunydyaỽl ymlad yn eu blinaỽ anuon
kennadeu a|wnaethant hyt at vruttus y erchi kanhorth+
ỽy am rydit vdunt kanys ofyn oed arnunt eu gỽaha+
nu ac o|eisseu ymborth goruot arnadunt rodi eu tẏ
A gỽedy dywedut hẏnnẏ y vrutus medylyaỽ a oruc
pa wed y gaỻei eu rydhau. Ac ofynhau a|oruc yn vaỽr
na|s gaỻei rac ofyn coỻi y|meint gỽyr oed idaỽ ac
nat oed gantaỽ ẏnteu eithyr hynnẏ mal y|gaỻei rodi
kat ar vaes y|wyr groec. A gỽedy medylyaỽ pop peth
ohonaỽ. seff y kauas yn|y gygor dỽyn kyrch nos am
eu pen a cheissaỽ tỽyllaỽ eu gỽylwyr a chyny|aỻei ef
hynnẏ heb kanhorthỽy rei o|wyr goroec galỽ anacletus
ketymdeith antigonus a oruc attaỽ a dywedut ỽrthaỽ
yn|y wed hon gan displeiniaỽ* cledyf arnaỽ. a|e tydy ỽr
jeuanc ony wney di yn gywir vuyd yr hẏn a archaf i
itti. ỻyma teruyn dẏ diwed ti. ac antigonus a|r cledyf
hỽn. A sef yỽ hyny pan vo nos heno y|medylyaf dỽyn
kyrch am ben gỽyr goroec mal y kaffỽyf gỽneuthur
aerua dirybud arnadunt A sef y|mynaf tỽyỻaỽ o+
honat ti eu gỽylwyr hỽy ac eu gỽerssyỻeu kanys
yndunt hỽẏ yd oed reit yn gyntaf ymchoelut yr
arueu mal y bei haỽs in kyrchu am ben y|ỻu. Ac ỽrth
hynnẏ gỽna ditheu megys gỽr kaỻ doeth ymegys
yd ỽyf vi yn|y herchi itti yn gywir fydlaỽn. Pan del
y|nos kerda parth ac at y|ỻu. A|phỽy bynac a gẏfarffo