Breudwd Welsh Prose 1300-1425
Cymraeg

NLW MS. Llanstephan 27 (The Red Book of Talgarth) – page 17r

Ystoria Lucidar

17r

eithretoed. Odyna iach vydant megys na|synnyant yma
boen y·gyt a|dynyon. Y rei a|lysc gorthrymaf dolur rac|ỻaỽ.
Y rei gỽirion a|vyd eissyeu ac amarch a|heint arnadunt yma
rac eu digrifhau y|myỽn petheu drỽc. ac y dileu o|r gỽneynt
beth yn erbyn duỽ. ac ony|s gỽnelynt y gaffael tal gan|duỽ
dros eu hanhuned. discipulus Paham yng|gỽrthỽyneb y hynny y byd
kyfoethaỽc y rei da a chadarn a iachus. a|r rei drỽc yn dlody+
on ac yn wann ac yn|heinus. Magister Y rei o|r etholedigyon y ro+
dir goludoed udunt y aỻu cỽplau o|e da eu gỽeithretoed
da. y|rei a|vynnynt y wneuthur. ac y|dangos udunt os es+
mỽyth yma y da amseraỽl. mae esmỽythach o laỽer yỽ y da
tragywydaỽl. Kadarn vydant yn|gyntaf o|e hachaỽs e|hun
y aỻu cỽplau yr hynn a|vedylyon. a|r eil|peth o achaỽs yr etho+
ledigyon y aỻu rodi amdiffyn udunt ar|da. a|r trydyd peth
o achaỽs y rei drỽc y aỻu eu gostỽng. rac gỽneuthur onadunt
gymeint ac a|vynnont. Jach vydant rac tristau y|rei gỽirion
oc eu clefyt ỽy. ac y eu|ỻawenhau oc eu hyechyt. yng|gỽrthỽ+
yneb y hynny ryỽ·rei drỽc a|boenir yma o eissyeu a|thraỻaỽt
a|dolur. yr dysgu udunt chwerwed y poeneu y maent yn dyf+
ryssyaỽ udunt drỽy eu kamweithretoed. discipulus Paham o|r rei
drỽc y byd byỽ rei. a rei o|r rei ˄da varỽ yn ehegyr. ac yng|gỽrth  ̷+
ỽyneb y hynny rei o|r rei da yn|vyỽ yn hir. a rei o|r rei drỽc
yn marỽ yn ehegyr. Magister Y rei drỽc a|edir yn vyỽ yn hir y o+
vityaỽ y rei gỽirion. ac y purhau eu pechodeu drỽydunt
ac o|e poeni ỽynteu yn vỽy rac ỻaỽ. Y rei da a dygir ynteu
yn ehegyr. yr dỽyn gỽrthỽynebed y byt hỽnn y ỽrthunt.
ac y eu gossot yn|ỻewenyd tragywydaỽl. Yng|gỽrthỽyneb y