Breudwd Welsh Prose 1300-1425
Cymraeg

NLW MS. Llanstephan 27 (The Red Book of Talgarth) – page 177r

Gwyrtheu Mair

177r

y bop un o·honunt yn herwyd y aỻu yn sỽỻt y|r eglỽys o
eur ac aryant y|ganhorthỽyaỽ o|delei yr|apostat yn uuduga+
ỽl dra|e|gevyn keissyaỽ kynny bei amgen y dangnefedu o rod+
yon a hynny a edewis paỽp o·honunt yn ỻawen. ac a|wnaeth+
ant gỽedy ysgriuennu eu henweu. os duỽ a gymerei dialỽr
brenhin creulaỽn kymryt o·nadunt y briodolder. Ac odyna
  y kerdaỽd seint basil a|e gynnuỻeitua hyt y|mynyd di+
  dim. yn|y ỻe yd oed temyl y|r ogonedus ueir wyry. Ac
yno y trigyassant teir·nos a thri·dieu yn dyrwestu ac yn
gỽediaỽ ac yn|saỻỽyraỽ. ac yn keisaỽ yn wylofus gỽynuanus
tangnefed duỽ a|e rybuchedic vam ynteu. a gỽedy cỽplau
dyrwest tridieu. yn|y dryded nos y gỽelit trỽy y hun y|r sant
hỽnnỽ bot marchaỽclu o nef yn kudyaỽ y mynyd. ac ym+
plith hynny y gỽelei nebun yn|abit gỽreigyaỽl vrenhines
ac yn rac·ulaenu y myỽn kadeir. ac yn dywedut ỽrth baỽp
o|e chylch Gelỽch yn ebrỽyd seint mercur verthyr ỽrth lad
Julian apostat. yr hỽnn yssyd valch o|e eneu yn ymgeinaỽ a
mi. ac a|m mab. A phan doeth hỽnnỽ ef a gerdaỽd yn aruaỽc
hyt ym pers. ac nyt amgen weledigaeth a honno a weles
libanius athro ac ynteu gyt a|r brenhin ym pers. a gỽedy
dechreu o seint basil bendigaỽ. duỽ a|r wynuydedic ueir. ac
a|phaỽp o|e gedymdeithyon yn kysgu. kyrchu a|oruc merth+
yrolyaeth seint mercur a cheissaỽ y arueu ac ny|s kafas.
A gouyn a|oruc ynteu y geitwat yr eglỽys pa|le yd athoe+
dynt arueu y verthyrolyaeth ef. a hỽnnỽ a|dyngaỽd eu
bot ỽy yno y nos gynt. ac na wydyat ynteu na pha|le
na pha du yd athoedynt ỽy odyno. ac ymchoelut a|oruc yr