Breudwd Welsh Prose 1300-1425
Cymraeg

Oxford Jesus College MS. 119 (The Book of the Anchorite of Llanddewi Brefi) – page 110r

Buchedd Beuno

110r

yr arglỽyd vrth y seint. Meibon benndigedic vyntat
i. deỽch chỽi y|veddv y|deyrnnas a barattoet y·ỽch yr
dechreu byt. y lle y byd buched heb angheu. a Jeueg+
tit heb heneint. a Jechyt heb dolur. A lleỽenyd heb
tristit. Y seint yn|y rad vchaf ygyt a|duỽ dat. yn vn+
olyaeth ar engylyon. ar archengylyon. yn vnolyaeth
a|dysgyblon iessu grist. yn vnolyaeth naỽ rad nef y|rei
ny phechassant. yn vnolyaeth y|tat ar mab ar yspryt
glan. ameN. Archỽn nynheu trugared duỽ holl gy+
uoethaỽc drỽy gannhorthỽy beuno sant. val y|gallom
nynheu gaffel ygyt ac euo buched tragyỽyd ynn|yr
oes oessoed amen. llyma ach beuno. ~
Beuno vab bugi. vab gỽynlliỽ. vab tegit. vab kadell
drynlluc. vab categyrnn. vab gortheyrnn. vab gorthe+
gyrnn. vab rittegyrn. vab deheuỽynt. vab eudegan.
vab eudegern. vab elud. vab eudos. vab eudoleu. vab
auallach. vab amalech. vab belim. vab anna. mam
yr anna honno oed gefnitherỽ y|veir ỽyry mam grist.