Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 86r

Brut y Tywysogion

86r

361

maredud. ab Kynan y hoỻ dylyet
ym meironnyd. a chan dyfynnu dauyd
y lundein y|r cỽnsli. a|dỽyn ygyt ac
ef ruffud y uraỽt. a|r hoỻ garcharory+
on a|oed y·gyt ac ef yg|karchar y bren+
hin y lundein. ac yna y bu uarỽ y na+
ỽuet gregori bab. Ẏ ulỽydyn rac ỽy+
neb ychydic wedy y pasc y mordỽy·aỽd
henri urenhin y peitaỽ. y geissaỽ gan
y ffreinc y dylyet ar y|dired a|dugassei
urenhin ffreinc y gantaỽ kyn no hyn+
ny ac ny|s cauas y ulỽydyn honno.
Namyn gỽedy geỻỽg y Jeirỻ drache+
fyn y|trigyaỽd ef a|r urenhines ym mỽr+
dyỽs. Ẏ vlỽydyn honno y kadarnha+
ỽyt hynn o gestyỻ yg|kymry y gan va+
elgỽn vaelgỽn uychan Garthgrugyn.
Ẏ gan Jon mynyỽ Bueỻt. Ẏ gan roser
mortymer Maelenyd. ac y bu uarỽ
gruffud ab Maredud ab|yr arglỽyd rys
archdiagon keredigyaỽn. Ẏ vlỽydyn
rac ỽyneb yd|ymchoelaỽd. Henri urenhin
o vỽrdyỽs. ac y kyỽarsagỽyt y kymry
a ỻaỽer o|r rei ereiỻ yn agkyfreithaỽl
Ẏ vlỽydyn rac ỽyneb y|bu uarỽ Rys
mechyỻ uab Rys gryc. Ẏ vlỽydyn
honno y keissaỽd Gruffud ab ỻywelyn
dianc o garchar y brenhin yn ỻundein
wedy bỽrỽ Raff drỽy fenestyr y tỽr aỻan
a diskynnu ar|hyt y raff. a|thorri y raf
a|e syrthaỽ ynteu yny dorres y vynỽ+
gyl. ac yna y ỻidyaỽd dauyd ab ỻywe+
lyn. a dyuynnu a|oruc y hoỻ wyrda y+
gyt. a ruthraỽ y elynyon o|e hoỻ der+
uyneu eithyr a|oedynt y|myỽn kestyỻ
ac anuon kenadeu a ỻythyreu a|ỽna+
eth a|dyuynnu attaỽ hoỻ dywyssogy+
on kymry. a phaỽb a|gyuunaỽd ac ef
eithyr gruffud ab Madaỽc. a gruffud
ab gỽenỽynỽyn. a Morgan ab howel
a ỻaỽer o goỻedeu a|wnaeth ef y|r rei
hynny. a|e kymheỻ o|e hanuod y|dares+
tỽg idaỽ. Ẏ ulỽydyn honno y bu uarỽ
Maredud ab rotbert penn·kyghorỽr
kymry. wedy kymryt abit crefyd yn
ystrat fflur. Ẏ ulỽydyn rac ỽyneb y

362

kynnuỻaỽd henri vrenhin gedernit
ỻoeger ac Jwerdon ar|uedyr dar·estỽg
hoỻ gymry idaỽ. ac y|doeth hyt yn te  ̷+
ganỽy. a gỽedy kadarnhau y kasteỻ
ac adaỽ marchogyon yndaỽ yd ymchoe+
laỽd y loegyr. gan adaỽ aneirif o|e lu
yn galaned heb y cladu wedy ỻad rei
a|bodi ereiỻ. Ẏ ulỽydyn rac ỽyneb y bu
uarỽ dauyd ab ỻywelyn yn aber. vis
maỽrth. ac y cladỽyt gyt a|e dat yn aber  ̷
conỽy. a gỽedy nat oed etiued o gorff idaỽ
y gỽledychaỽd Owein goch a ỻywelyn y
nyeint meibon gruffud ab ỻywelyn y  ̷
vraỽt yn|y ol. Ẏ rei hynny o|gyghor gỽyr+
da a rannassant y kyuoeth yn deu hanner
Ẏ ulỽydyn honno yd anuones henri uren  ̷+
hin Nicolas dy mulus. a Maredud ab
rys. a Maredud uab owein y digyuoethi
Maelgỽn vychan. ac yna y goruu ar
vaelgỽn a|e eid·aỽ ffo hyt yg|gỽyned. ac
Owein a ỻywelyn veibon gruffud ab ỻywelyn.
gan adaỽ y kyuoeth y estronyon. ac o
achaỽs bot brenhinaỽl aỻu yn|dyuyn  ̷+
nu paỽb o|r a|vei gyfun. a|r brenhin
yn erbyn owein. a|ỻywelyn. a Maelgỽn
a howel ab maredud o|wlat uorgan
a oed yna y·gyt ac ỽynt yg|gỽyned. we+
dy y digyfoethi yn|gỽbyl o Jarỻ clar.
a gỽedy gỽybot onadunt hynny yd ym+
gadwassant yn|y|mynyded a|r yn·yalỽch.
Ẏ vlỽydyn honno y bu uarỽ Raỽlff
mortymer. ac yn|y le y kyuodes roser
y uab. Y ulỽdyn* rac ỽyneb y bu uarỽ ho+
wel escob ỻan elyỽ yn ryt ychen ac yno
y cladỽyt. ac yna y bu uarỽ escob mynyỽ
Ẏ ulỽydyn honno yr ugeinuet dyd o vis
whefraỽr y crynaỽd y daear yn aruthur
yn gyffredin ar|draỽs yr hoỻ deyrnas
Y ulỽydyn rac ỽyneb y kymerth ar+
derchaỽc vrenhin ffreinc a|e|dri broder
ac anneiryf o luoed cristonogyon gyt
ac ỽynt eu hynt hyt yg|kaerussalem
ac am|diwed y ulỽydyn y mordỽyssant
y mor maỽr. Ẏ|vlỽydyn honno vis gor+
fennaf y gỽnaeth grufud abat ys+
trat fflur hedỽch a|henri vrenhin am